Россия Балыкчыдагы базага кандай жабдууларды берди
15:00 10.10.2022 (Жаңыртылды: 15:14 10.10.2022)
© Sputnik / Эркин Садыков
Жазылуу
Россия аскердик кызматташуунун алкагында жалпы баасы 260 миллион сом турган согуштук техника оңдогон жабдууларды берген.
БИШКЕК, 10-окт. — Sputnik. Россиянын Коргоо министрлигинин эл аралык аскердик кызматташуу боюнча башкы башкармалыгынын жетекчиси Александр Кшимовский Кыргызстандагы оңдоп-түзөө базасы кайсы иштерди аткарарын жана кандай техникалар берилгендигин айтты.
Эске салсак, кыргыз-орус аскердик кызматташуунун алкагында Балыкчы шаарында курал менен аскер техникаларын оңдой турган база ачылган.
Кшимовскийдин айтымына караганда, Россиянын Коргоо министрлиги аскердик кызматташуунун алкагында кайтарымсыз түрдө Кыргызстандын Куралдуу күчтөрүнө техникалык жактан тейлеген жай жана дөңгөлөктүү, каз тамандуу техникаларды оңдой турган жабдууларды берген.
Ал эки өлкөнүн достук жана союздаштык мамилелеринин ырааттуу түрдө өнүгүүсү аймактагы туруктуулукту камсыздаган эң маанилүү факторлордун бири экенине токтолду.
"Кыргызстан өзүнүн коопсуздугун камсыздоодо Россиянын жардамына ар дайым таянса болот. Аталган жай заманбап атайын жабдуулар менен камсыздалган, ченей турган тетиктер, аны менен катар эле документтештирип жана техникалык диагностиканы жасаган мүмкүнчүлүктөр бар. Бул база улуттук куралдуу күчтөрдүн, ЖККУнун сооттолгон танкалык жана дөңгөлөктүү техникаларын тез, сапаттуу тейлей алат", — деген Россиянын Коргоо министрлигинин өкүлү.
Кыргызстандын коргоо министри Бактыбек Бекболотов Луга (Ленинград облусу) шаарынан оңдоп-түзөөчү база келип түшкөндүгүн, анын жалпы баасы 260 миллион сом экенин айтты. Бул КР Куралдуу күчтөрүнүн кийинки тарыхындагы эң жагымдуу окуялардан болуп калгандыгын белгиледи.
Министр дагы эмнелерди айтты:
оңдоп-түзөөчү база тарыхый жерде — легендарлуу Панфилов дивизиясынын базасында жайгашкан;
бүгүн жаңы аскердик бөлүктүн түптөлүшүнө күбө болдук. Эми ал аскердик техникалардын жаңыланып, оңдоп-түздөлүп, кайра калыбына келиши боюнча иш алып барат;
бул Кыргызстандын Куралдуу күчтөрүн камсыздоодогу чоң салым болду. Дүйнөдөгү, анын ичиндеги борбор азиялык аймактагы аскердик-саясий абал чыңалган боюнча турат;
чек араны ишенимдүү түрдө коргоп, кайтаруу үчүн ишенимдүү техника жана окуп-үйрөтүлгөн аскердик курам керек;
аскердик кызматташуунун алкагында согуштук техникаларды тейлеген баасы 260 миллион сомдук техникалык пункт кайтарымсыз берилди.
10 Тогуздун айы 2022, 12:54
