Чек арадагы чырдан жабыркагандарга кандай жардам көрсөтүлөт? Президенттин жарлыгы
Жазылуу
Тажик тарап менен куралдуу кагылышуунун кесепетинен бузулган жана талкаланган имарат, үйлөрдү калыбына келтирүү боюнча мамлекеттик комиссия түзүлөт.
БИШКЕК, 18-сен. — Sputnik. Мамлекет башчы Садыр Жапаров "Баткен жана Ош облустарынын административдик-аймактык бирдиктерин калыбына келтирүү жана өнүктүрүү боюнча биринчи кезектеги чаралар жөнүндө" жарлыкка кол койгонун президенттин маалымат кызматы кабарлады.
Документке ылайык, тажик тарап менен куралдуу кагылышуунун кесепетинен бузулган жана талкаланган имарат, үйлөрдү калыбына келтирүү боюнча мамлекеттик комиссия түзүлөт.
Аларга коюлган тапшырмалар:
комиссия жаңжалдын кесепетинен жабыркаган жарандардын жана жеке жактардын менчигине келтирилген зыянды баалап, аларга компенсацияларды төлөп берүү боюнча тартиптин долбоорун иштеп чыгат. Андан соң министрлер кабинетинин бекитүүсүнө киргизет;
жергиликтүү өз алдынча башкаруу органдары, ӨКМ, ИИМ, Саламаттык сактоо, Санариптик өнүктүрүү министрликтери менен жабыр тарткан жарандардын, курман болгондордун, дайынсыз жоголгондордун, жаракат алгандардын, турак жайынан, кыймылдуу жана кыймылсыз мүлкүнөн айрылгандардын, документтерин жоготкондордун тизмесин түзсүн.
Министрлер кабинетине берилген тапшырмалар:
курман болгондордун үй-бүлөсүнө жана жабыр тарткан жарандарга бир жолку материалдык жардам берүү мүмкүнчүлүгү жөнүндө маселени карап чыксын;
жабыр тарткандарга жаңы турак үйлөрдү курууну камсыз кылуу менен убактылуу турак жай берсин, ошондой эле өзүнүн турак жайын калыбына келтирүүгө тартылган адамдарга аткарган иштерине акы төлөсүн;
биринчи зарылчылыктагы азык-түлүк, кийим-кечелерди, дары, мунайды үзгүлтүксүз жеткирүүнү, суу жана энергия менен камсыз кылсын;
талкаланган чек ара постторун жана пунктуларын, күч түзүмдөрүнүн жанан социалдык объектилерди ыкчам калыбына келтирүү боюнча чараларды көрсүн;
зыяндын ордун толтуруу жана жабыр тарткандарга жардам көрсөтүү үчүн каражаттарды тапсын;
Баткен облусундагы мамлекеттик чек аранын кыргыз-тажик участогунда жайгашкан чек арага жакын калктуу конуштарда иш жүргүзгөн субъектилер үчүн (күйүүчү-майлоочу материалдарды саткан жана кен казгандардан башка) 2024-жылдын 1-январына чейин салыктарды төлөөдөн нөл пайыз өлчөмүндө ставканы белгилесин;
ушул эле жакта иш жүргүзгөн жеке ишкерлерди 2024-жылдын 1-январына чейинки мөөнөткө камсыздандыруу төгүмдөрүн төлөөдөн бошотсун.
Мындан сырткары, президенттин жарлыгы менен Саламаттык сактоо министрлигине жана Эмгек, социалдык камсыздоо жана миграция министрлигине бир катар тапшырмалар берилген. Аларды толугу менен президенттин сайтынан окуй аласыздар.
