Турсуналиева: "Антиконтрафакт-2022" форумуна 500дөй конок келери күтүлүүдө
12:09 06.09.2022 (Жаңыртылды: 14:37 31.10.2023)
Жазылуу
Кыргызпатенттин Автордук укук жана чектеш укуктар башкармалыгынын башчысы Ырыскүл Турсуналиева кыргыз өкмөтү, "Антиконтрафакт" эл аралык ассоциациясы, ЕЭК менен биргеликте жасалма товар менен күрөшүү боюнча иш-чараны уюштуруп жатканын белгиледи.
"Антиконтрафакт-2022" эл аралык форумуна 500дөй конок катышат. Бул тууралуу Ырыскүл Турсуналиева Sputnik Кыргызстан радиосуна маек куруп жатып билдирди.
Турсуналиева: "Антиконтрафакт-2022" форумуна 500дөй конок келери күтүлүүдө
Анын айтымында, аталган форум Кыргызстандын ЕАЭБге төрагалыгынын алкагында болот.
"Антиконтрафакт-2022" эл аралык форуму 26-27-сентябрда Бишкекте өтөт. Ага 500гө чейин конок катышары күтүлүүдө. Ал буга чейин тогуз жолу өтүп, быйыл 10-мааракелик форум болот. Ошондуктан кызыктуу кылып өткөрүү максаты турат. Иш-чараны КР өкмөтү, "Антиконтрафакт" эл аралык ассоциациясы, ЕЭК уюштурууда. Форумда ЕАЭБдин алкагында котрафактылык товарларга бөгөт коюу маселеси талкууланат. Себеби жасалма товарлар адамдын жашоосуна, өлкөнүн экономикасына жана ак ниет ишкерлерге зыянын тийгизүүдө. Бул форумду өткөрүп туруу мезгилдин талабы. Кыргызстан тарабынан аталган форумга үч секция даярдалууда. Биринчиси — интеллектуалдык менчикти коргоо. Мында Бажы кызматы, укук коргоо органдары, Кыргызпатент кандай иш алып барышы керектиги талкууланат. Экинчиси — креативдүү экономика. Үчүнчүсү жасалма китептер боюнча болот. Анткени авторлор тарабынан бул багытта көп кайрылуулар болууда. Учурда жасалма китептер көбөйүп кетти, алардын сапаты кандай экени белгисиз", — деди Турсуналиева.
Ошондой эле ал программада IT, интеллектуалдык менчикти коргоо, фармацевтика, никотин ж.б. болуп жалпы 12 маселе боюнча талкуу уюштуруларын кошумчалады.
