Рахман: мигранттардын маселесин караган өзүнчө орган түзүү зарыл
© Sputnik / Асель Сыдыкова
Жазылуу
ЖК төрагасынын алдындагы миграция, мекендештер жана чет өлкөдөгү диаспоралар маселелери боюнча кеңеш катчылыгынын жетекчиси Медер Рахман чет өлкөдөгү кыргызстандык жарандар менен мамлекеттин ортосунда коммуникация жетишпей жатканын айтты.
Миграция маселесинде иш алып бара турган өзүнчө мамлекеттик орган түзүү мезгили келип жетти. Мисалы, президенттин алдында улуттук агенттик болсо чет элдеги биздин жарандарыбыз туш болгон көйгөйлөрдү чечүү маселеси жеңилдемек. Мындай пикирин Медер Рахман Sputnik Кыргызстан радиосуна маек куруп жатып билдирди.
Рахман: мигранттардын маселесин караган өзүнчө орган түзүү зарыл
Анын айтымында, бул орган ички, тышкы миграциялык иштердин сапаттуу аткарылышын шарттамак.
"Учурда, тилекке каршы, мамлекет менен эмгек миграциясында жүргөн жарандарыбыздын ортосунда ажырым бар. Коммуникациядан аксап турабыз. Эгер мамлекет өзүнүн күчү жетпей жаткан иштер болсо, чочулабай эле ишти аткарчуларга бериш керек. Мисалы, биз чет өлкөлөргө чыгууда виза ачтыруу үчүн ошол мамлекеттин элчилигине барбайбыз да. Болгону виза борборлоруна кайрылабыз. Мына ушул сыяктуу калкты тейлөөчү борборлорду жеке менчикке өткөрүп берип, өкмөт өзү көзөмөлдөөчү функцияны алса деле болот. Мындан биринчи кезекте эмгек миграциясында жүргөн кыргызстандыктардын түйшүгү жеңилдейт. Биз эсептеп көрсөк, бир эле паспортун алмаштыруу же айдоочулук күбөлүк алуу үчүн 12-13 кадамды басып өтүшөт экен. Бул эмне деген убакыт жана каражатты талап кылат. Ушул операцияларды жогорудагыдай борборлордун жардамы менен 5-6 кадам менен эле бүтө турган кылып кыскартса болот да. Анан дагы бизде эмгек миграциясына кеткен жарандар көп болгондуктан элчилик, консулдуктар жетишпей калып жатат. Баарын эле ТИМге үйө бербей, өзүнчө бир мамлекеттик орган түзүү мезгили келип жетти. Маселен, президенттин алдындагы миграциялык иштерди алып барган атайын улуттук агенттик болсун", — деди Рахман.
Ал жогорудагыдай кадамдар элдин мамлекетке болгон ишенимин арттырарын кошумчалады.
