Курултайдын эмне зарылдыгы бар? Президенттин кеңешчиси түшүндүрдү
© Sputnik / Асель Сыдыкова
Жазылуу
Президенттин кеңешчиси, Элдик курултайды өткөрүү боюнча уюштуруу комитетинин мүчөсү Чолпонбек Абыкеев курултайды уюштуруунун максатын жана юридикалык негиздемесин түшүндүрүп берди.
Курултай жыл сайын өтүш керек эле, бирок Жогорку Кеңеш тийиштүү мыйзамды кабыл алууну создуктуруп, Баш мыйзамдын 70-беренеси иштебей келди. Бул тууралуу Чолпонбек Абыкеев Sputnik Кыргызстан радиосуна маек куруп жатып билдирди.
Курултайдын эмне зарылдыгы бар? Президенттин кеңешчиси түшүндүрдү
Анын айтымында, курултай институт катары Конституцияга киргизилген.
"Курултайга коомчулук нааразычылык билдирип жатат деген — бул жаңылыш пикир. Аны колдогон ой-пикирлер басымдуулук кылат. Конституциянын 7-беренесинде "Курултай конституциялык мыйзамдын негизинде уюштурулат" деп жазылып турат. Аны Жогорку Кеңеш кабыл алууга милдеттүү болчу. Мына ошол Баш мыйзамдын талабын эске алып, президенттин жарлыгы менен конституциялык мыйзамды иштеп чыгуу үчүн атайын жумушчу топ түзүлгөн. Аталган топ мыйзамды жазып, анын долбоору коомдук талкуудан өткөрүлгөн. Кийин ал Жогорку Кеңеште каралып, комиттетердин жарымы колдоп, калганы каршы чыгып, ошол бойдон калып кетти. Курултайды уюштуруу боюнча президенттин жарлыгында анын юридикалык негиздемеси так көрсөтүлгөн. Конституциянын 70-беренесинде президент жана мамлекеттик органдар жылына бир жолу элдик курултайда кайрылуу жасай турганы айтылган. Эки жылга кетти, парламент мыйзамды кабыл албай чойгонуна байланыштуу Конституциянын бул беренеси иштебей калууда. 25-ноябрда Курултайда президент жана мамлекеттик органдар эки жылда жасалган иштер жана келечектеги пландар боюнча толук маалымат берет. Мындайча айтканда, элдин талаптары, коомду түйшөлткөн маселелер ошол жерден талкууланат. Ошондуктан аталган иш-чарадан кийин Курултай институтуна баа берүү зарыл", — деди Абыкеев.
Ошондой эле ал Курултайда башкы прокурор, элдин талабы болсо Жогорку сот дагы маалымат бериши ыктымал экенин кошумчалады.
