Сманова: сентябрга чейин РФтеги мигранттар документтерин иреттеши керек
Жазылуу
Тюмень шаарындагы "Биримдик" кыргыз диаспорасынын төрайымы Канзада Сманова Россияда эмгектенип жүргөн кыргызстандыктарды ушул жылдын 3-сентябрына чейин документтерин иреттеп алууга чакырды.
Пандемия учурунда Россия президентинин жарлыгы менен жакынкы чет өлкөлөрдүн жана Борбордук Азиядан келген эмгек мигранттарына аталган өлкөдө жүрүү, эмгектенүү боюнча бир топ жеңилдиктер берилген эле. Мисалы, каттоого турбоого, онлайн кайрылууга, шарты жок болсо патентти көрсөтүлгөн мөөнөттө төлөбөй коюуга уруксат берилген болчу. Ошондой эле Россияда эмгектенүү убактысы бүтүп калган болсо мурдагыдай чек арадан чыгып кирбей эле онлайн узартууга мүмкүнчүлүк берилген. Бул тууралуу Канзада Сманова Sputnik Кыргызстан радиосуна маек куруп жатып билдирди.
Сманова: сентябрга чейин РФтеги мигранттар документтерин иреттеши керек
Анын айтымында, жогорудагы жеңилдиктер ушул жылдын 4-сентябрынан тарта токтотулат.
"Пандемия учурунда Россия бийлиги тарабынан эмгек мигранттарына берилген жеңилдиктер чек арасы кесилишкен мамлекеттердин жарандары үчүн август айында, ал эми ЕАЭБге кирген өлкөлөрдөн келгендерге 4-сентябрда токтотулат. Андыктан кыргызстандыктар 3-сентябрга чейин бардык документтерин иреттеп, патенттерин төлөп, эмгек келишимдерин түзүп, бир жолу өтсө өмүр бою жарачу дактилоскопиядан, жылына бир жолу талап кылынчу медициналык кароодон өтүп, мөөнөтү бүтүп бараткандар чек арадан кирди-чыкты кылып алганы туура. Анткени 4-сентябрдан баштап мыйзам күчүнө кирип, текшерүүлөр башталат. Кыргызстандыктар Россияда жүрүү мөөнөтү бүткөн учурда мурдагыдай мекенине барып 90 күндөн кийин гана кайра келүүгө эмес, жөн гана Россиянын чек арасынан чыгып-кирүү мүмкүнчүлүгүнө ээ. Мисалы, Тюмень шаарындагылар Казакстанга чыга коюшуп эле бул маселени чечип алышат. Ошондой эле Кыргызстан ЕАЭБге мүчө болгондуктан иштейм деп келгендер бир ай ичинде каттоого турушу керек. Айрым учурда Өзбекстан, Тажикстандын жарандары менен чаташтырып, бир жумада туруш керек деп каттоого чуркап жүрүшүп, жогорудагы талаптарды аткаруу мөөнөтүн өткөрүп жиберишет. Андыктан келери менен биздин жарандар дактилоскопиядан, медициналык кароодон өтүп, андан соң деле каттоого тура берсе болот", — деди Сманова.
Ал ошондой эле расмий эмгек келишими менен иштегендер үч жылдан кийин жарандык алууга мүмкүнчүлүк түзүлөрүн жана медициналык полиске ээ болорун кошумчалады. Буга катар жарандын өзү үчүн көптөгөн пайдалуу жактары бар экендигин белгиледи.
