Султан уулу: ашыкча салмактан арылуу өмүр бою улана турган нерсе
Жазылуу
Кардиолог, терапевт Эрмек Султан уулу өлкөдө инфаркт жана инсульттун кесепетинен болгон өлүмдүн деңгээли жогору экенин айтты.
Дүйнө жүзүндөгүдөй эле Кыргызстанда дагы ашыкча салмактан жабыркаган адамдардын саны өсүп баратат. Өзгөчө 30 жаштан өткөн эркектерде жана төрөгөн аялдарда көйгөй курч. Бул тууралуу Эрмек Султан уулу Sputnik Кыргызстан радиосунун эфиринде маек куруп жатып билдирди.
Султан уулу: ашыкча салмактан арылуу өмүр бою улана турган нерсе
Анын айтымында, салмактан арылууда кыргызстандыктардын эрки жок.
"Кыргызстанда адамдар ашыкча салмакты оору катары эсептебейт. Тескерисинче, токчулуктун, байлыктын, эркек кишилер "авторитеттин" белгиси деп санашат. Көпчүлүгү качан гана семирүү экинчи стадияга өтүп, саламаттыгы начарлай баштаганда өзүн карай баштайт. Туура эмес тамактануу, туура эмес жашоо образы, алкоголдук ичимдик ичүү жана тамеки чегүү семирүүнү шарттай турчу себептер. Жыйынтыгында кан басым жогорулап, кант диабети пайда болуп, холестерин көтөрүлүп эрте жашында эле адамдар инфаркт, инсультка кабылууда. Дал ушул себептен өлкөдө аталган эки оорунун кесепетинен болгон өлүмдүн деңгээли жогору. Адамдын ден соолугуна кайдыгер мамиле кылуусу да абалга чоң таасир тийгизет. Эгерде адам ашыкча салмагын жөнгө сала турган болсо бардык коркунучтардан арылып, болбоду дегенде эле 80 пайызга абалы жакшырмак. Салмактан арылуу үчүн эмне кылуу керек экенин бардык адамдар билет. Бирок ошол талаптарды эч эле так аткарбайт. Тамактануусун жөнгө салса кыймылдаганы аз, көп кыймылдаганы менен туура эмес тамактангандар көп. Семирүүнүн 2-3-стадиясы менен жабыркагандар мындай аракети менен салмактан арыла албай кыйналып, көптө жыйынтык алат. Бир ай диетага отуруп кайра баштапкы жашоо образына кайткандын эч мааниси жок. Ашыкча салмактан арылуу өмүр бою улана турган нерсе", — деди Султан уулу.
Ал семирүү көптөгөн ооруларды, анын ичинде муун ооруларын козгой турганын белгилеп, оорунун кесепеттерин эмес, себебин аныктап, дарылоо керектигин эскертти.
