Исаков: жол коопсуздугун эле эмес туристтин да коопсуздугун камсыздайбыз
Жазылуу
Бишкек шаардык милициясынын кайгуул кызматынын жетекчиси, подполковник Алмазбек Исаков туристтик милиция жайкы эс алуу сезонуна байланыштуу борбор калаада күчөтүлгөн тартипте иштеп жатканын айтты.
Бишкек шаардык милициянын кайгуул кызматы көп багытта иш алып барат. Анын бир багыты жайкы эс алуу учурунда Ысык-Көл облусуна эс алууга жөнөгөн туристтердин коопсуздугун камсыздоо болуп эсептелет. Быйылкы сезондо азырынча Ысык-Көл аймагына 12 экипаж жиберилди. Бул тууралуу Алмазбек Исаков Sputnik Кыргызстан радиосунун эфиринде маек куруп жатып билдирди.
Исаков: жол коопсуздугун эле эмес туристтин да коопсуздугун камсыздайбыз
Анын айтымында, туристтик милициянын кызматкерлери кыргыз, орус, англис, түрк, француз тилдеринде сүйлөй алышат.
"Биздин кызматкерлер бир эле жол коопсуздугун эмес, туристтердин да коопсуздугун камсыз кылат. Ошону менен бирге мотокайгуулдарыбыз бар. Алар атайын шаардагы туризмди өнүктүрүү максатында түзүлүп, көп тил билген кызматкерлер ишке алынып, өзүн-өзү алып жүрүү, саякатчылар менен маектешүүдөгү эрежелер үйрөтүлөт. Алар бир эле учурда туристтерге котормочу катары да кызмат көрсөтүп келишет. Мисалы, француз тилдүү бир саякатчы кызматкерибизге кайрылып калса, кызматкер өзү француз тилин билбесе дароо ошол тилди билген кесиптештерине чалып, туристке телефон аркылуу жардам көрсөтүлөт. Мындан сырткары, жеке эле чет элдик эмес, ички саякатчыларга да көңүл бурулган. Өзгөчө дем алыш күндөрү шаар четиндеги эс алуучу зоналарга чыгабыз. Ал жакта эс алып жүргөн адамдардын коопсуздугу, жол коопсуздугунан сырткары экологияга аяр мамиле кылууга үндөп, түшүндүрүү иштерин жүргүзөбүз", — деди Исаков.
Ал жайкы сезон күч алган учурда Ысык-Көл облусуна 90 кызматкерден турган 45 экипаж жиберилерин кошумчалады.
