Шатманов: россиялыктарды ден соолукту чыңдоо туризмине тартуудабыз
Жазылуу
Туризм департаментинин жетекчиси Самат Шатманов быйылкы туристтик сезондо ар өлкөдөн келүүчү саякатчылардын жеке кызыкчылыктарын эске алуу менен жарнамалоо механизми иштелип чыкканын айтты.
Бизге туристтер көп келүүчү өлкөлөрдүн тизмеси түзүлүп, андагы саякатчылардын жеке кызыгууларын эске алуу менен кыргыз туризмин жарнамалоо менеджменти быйыл колго алынды. Бул тууралуу Самат Шатманов Sputnik Кыргызстан радиосунун эфиринде маек куруп жатып билдирди.
Шатманов: россиялыктарды ден соолукту чыңдоо туризмине тартуудабыз
Анын айтымында, россиялык туристтер коронавирустук пандемиядан соң ден соолукту чыңдоочу жайларга көп кызыккандыктан, туризмди бул өлкөдө жарнамалоодо ушул багытка басым жасалган.
"Быйыл мурдагы жылдардан айырмаланып туристтерди алардын жеке, улуттук өзгөчөлүктөрүнө, кызыкчылыктарына басым жасоо менен тартууга аракет кылып жатабыз. Саякатчылар көп келүүчү өлкөлөрдү тизмектеп, жайкы сезон башталарда ошол мамлекеттерге барып, кыргыз туризми тууралуу маалымат берген ар кандай иш-чараларды уюштурганбыз. Мисалы, араб өлкөлөрү биздин табиятыбызга, тоолорубузга суктанып, ушул тармактагы эс алууга көп кызыгышат экен. Бул жактарда биз Кыргызстандын табияты, нукуралуулугу тууралуу маалыматтарды жайылтуу менен иштедик. Ал эми бизге турист көп келчү дагы бир өлкө, Россияда коронавирустук пандемиядан соң саякатчылардын көпчүлүгүн ден соолукту чыңдоочу эс алуу жайлар кызыктырат экен. Биз аларды санаторий, ден соолукка пайдалуу болгон табигый заттар, булак, ылай, туздуу көлдөр жана башка жерлерибиз менен тааныштырдык. Ошондой эле жакында Будапешт — Бишкек — Будапешт авиакаттамы да ачылганы турат. Бул жактагы туристтерди да көчмөн цивилизациясы кызыктырып, Кыргызстанга саякатчылардын үзгүлтүксүз каттоосуна жол ачылат деп мерчемделүүдө", — деди Шатманов.
Ал жайкы туристтик сезон май айында ачылгандан тартып эле чет мамлекеттен келген саякатчылардын саны көп болуп жатканын кошумчалады.
