Турсунбаева, Океев, Рыскулов... Баткенде 51 жыл мурун тартылган таберик сүрөт

Жазылуу
НовостиTelegram
Sputnik Кыргызстан маалымат агенттиги архивде сакталып жаткан сейрек сүрөттөрдү жарыялап, тарыхын баяндайт.
© Фото / из семейного архива Океевых
Белгилүү актриса Таттыбүбү Турсунбаева, уулу Канат, ортодо кинорежиссер Төлөмүш Океев, гример Вера Белякова жана актер Искендер Рыскуловдун сүрөтү 1971-жылы Баткен облусунда тартылган.
Ал жылы СССРдин эл артисти Төлөмүш Океев жазуучу Насирдин Байтемировдун "Тарых эстелиги" романынын негизинде "Отко таазим" аттуу тасма тартууга киришип, сүрөттөгү инсандар чыгармачыл топтун курамына кирген.
Ошол кезеңди Кыргыз Республикасынын эмгек сиңирген артисти, таланттуу актер, тасмада Мурза деген баланын ролун аткарган Назирет Дубашев мындайча эскерет.
"Бул сүрөт Уркуянын өрттөлө элек үйүндө тартылган экен. Биз ал жерде костюмдарыбызды алмаштырып, гримге отуруп кетчүбүз. Мен "Отко таазимге" тартылганда бир ай жүрүп калдым. Төлөмүш Океев топтогон актердук курам абдан күчтүү эле. Муратбек Рыскулов, Сабира Күмүшалиева, Болот Бейшеналиев, Советбек Жумадылов, Сүймөнкул Чокморов, Таттыбүбү Турсунбаева, Искендер Рыскулов, Жамал Сейдакматова өңдүү залкарлар тартылган. Баткендеги мейманкана барып түнөп келип иштечүбүз. Соңунда Уркуяны өлтүргөн эпизоддо басмачылар үйдү өрттөп салат эмеспи, биз ал үйдү солярка чачып өрттөп тартканбыз. Операторлор иштеп жатканда от күчөп кеткендиктен баарыбыз чака-чайнек менен суу ташып эптеп өчүргөнбүз. Режиссер топусун, чапанын кийип алып биз менен чогуу чуркап жүргөнү эсимде", — деди Дубашев.
Кинофильмде Кыргызстанда совет бийлиги орногон алгачкы жылдардагы окуялар, бай-манаптардын кулакка тартылышы, колхоздоштуруу көрсөтүлүп, эң алгачкылардан болуп айылдык советтин төрайымы болгон Уркуя Салиеванын өмүрү баяндалат.
Аталган кинокартинадагы кызыктуу ирмемдерди Sputnik Кыргызстан агенттигинин материалынан көрүүгө болот.
Жаңылыктар түрмөгү
0