Чокиев: согуш учурунда Кыргызстанда театрлар, концерттик залдар иштеп турган
Жазылуу
Композиторлор союзунун төрагасы, маданиятка эмгек сиңирген ишмер Турдубек Чокиев Улуу Ата Мекендик согуш учурунда Орто Азияга искусство өкүлдөрү эвакуацияланганын белгиледи.
Согуш учурунда искусство бийик деңгээлде кармалып, Кыргызстанда театрлар, концерттик залдар иштеп турган. Бул тууралуу Турдубек Чокиев Sputnik Кыргызстан радиосуна маек куруп жатып билдирди.
Чокиев: согуш учурунда Кыргызстанда театрлар, концерттик залдар иштеп турган
Анын айтымында, согуштун алдында чыгармачыл союздар жаңыдан түзүлө баштаган.
"Кыргызстанда согуш учурунда дагы искусство бийик деңгээлде кармалып турган. Буга ошол учурдагы бийлик искусство ишмерлерин Орто Азияга эвакуациялай баштаганы себеп болушу мүмкүн. Алар чыгармачылыгын токтотпой опера-балет коюп, музыка жазган. Чыгаан артисттер фронтко барып концерт коюшса, тылда театр, концерттик залдар иштеп турган. Ошол жылдары "Анар", "Чолпон" балети, "Көл жээгинде", "Алтын көкүл" операсынын премьерасы болгон. Ал тургай Евгений Онегин операсын кыргызча которуп, Татьянанын ариясын Сайра Кийизбаева ырдаган. Согуш жылдарында Муса Баетовдун "Сагынам", Атай Огонбаевдин "Эр Панфилов" деген ырлары жазылган. Калый Молдобасановдун "Саманчынын жолу" балет ораториясы СССРдин мамлекеттик сыйлыгына татыган. Бул мамлекеттик тапшырык менен Жеңиштин юбилейлик датасына карата жазылган. Эгемендүүлүк алгандан бери бир дагы балет, операнын премьерасы болгон жок. Ата Мекендик согуш, Улуу Жеңишке арналган деле композициялар чыкканы байкалбайт. Себеби мамлекеттик тапшырык берилбей калды. Дайыма эле каражат жок, экономика начар деген шылтоолор айтылат. Согуш учурунда деле каражат тартыш болгон, бирок искусствого көңүл бурулган. Анткени искусство, маданият, адабият деген бул идеологияны таратуу куралы болуп саналган. Азыр өлкөнүн идеологиялык багыты дагы жок болуп турат", — деди Чокиев.
Ал ошондой эле искусство, маданият, адабиятты колдоого алуу менен коомду жакшы нукта тарбиялоого болорун кошумчалады.
