Сагынбаев: коруктарды сейил бактарына айлантып салдык
09:54 29.04.2022 (Жаңыртылды: 10:05 29.04.2022)
© Sputnik / Асель Сыдыкова
Жазылуу
Улуттук илимдер академиясына караштуу Сапаш Касиев атындагы Зоологиялык музейдин жетекчиси Сейитказы Сагынбаев өлкөдө коруктар корулбай жатканын айтты.
Кыргызстанда 10 корук, 12 жаратылыш паркы жана 55тен ашуун кичинекей корук бар. Бул тууралуу Сейитказы Сагынбаев Sputnik Кыргызстан радиосунда маек куруп жатып билдирди.
Сагынбаев: коруктарды сейил бактарына айлантып салдык
Анын айтымында, коруктарда илимий кызматкерлердин санын көбөйтүү керек.
"Бизде корук деген статустагы жайлар дагы жаратылыш паркына айланып кетип жатат. Мисалы, ошол эле Сары-Челек коругу биосфералык аймак болуп эсептелет. Ал жерге шерине, той өткөрүп, кадимкидей элдин киришине уруксат берилет. Корук болгон соң айланасы корголгон, илимий иштер гана жүргөн жай болушу шарт. Ысык-Көл коругу да сейил багына айланып кеткен. Болбосо аларды корук дебей, жаратылыш паркы деп статусун өзгөртүп салуу керек. Мындай болбойт да. Коруктарды коргоп, илимий иш жүргүзүп, андагы илимпоздордун штатын кеңейтүү керек. Мурда Ысык-Көл коругунда алты, Сары-Челекте 12, башкаларында төрттөн илимий кызматкер болор эле. Азыр эми бирден гана штат калтырып коюшуптур", — деди Сагынбаев.
Ал коруктарга олуттуу көңүл бурулбаса баалуу илимий эмгектерди жоготуп алуу коркунучу бар экенин кошумчалады.
