Темир жол жана авиакаттам ачуу. КР жана РФ өкмөттөр аралык комиссиянын кеңеши
15:46 15.04.2022 (Жаңыртылды: 15:49 15.04.2022)
© Фото / пресс-служба Кабинета министров КР
Жазылуу
Кечээ Россияда соода-экономикалык, илимий-техникалык жана гуманитардык кызматташтык боюнча кыргыз-орус өкмөттөр аралык комиссиясынын кеңешмеси болгон.
БИШКЕК, 15-апр. — Sputnik. Москвада өткөн кыргыз-орус өкмөттөр аралык комиссиясынын 23-кеңешмесинин жыйынтыгы боюнча протоколго кол коюлду. Бул тууралуу өкмөттүн маалымат кызматы кабарлады.
Анын жүрүшүндө эки тараптуу кызматташуунун актуалдуу маселелери боюнча кеңири сүйлөшүү жүргөн.
Кеңешменин жыйынтыгы боюнча бир нече макулдашууга кол коюлганы айтылды:
2026-жылга чейин гидроэнергетика тармагындагы долбоорлорду биргелешип ишке ашырууда жол картасын даярдоо үчүн Кыргызстандын Энергетика министрлиги менен Россиянын "Гидродолбоор институту" АКнын эки тараптуу жумушчу тобун түзүү чечими кабыл алынган;
Россия Федерациясынын Өнөр жай жана соода министрлигине Кыргызстандын жеңил өнөр жай ишканаларынын продукциясынын ассортименти көрсөтүлгөн каталогун жөнөтүү макулдашылган;
тараптар санитардык-эпидемиологиялык абалды эске алуу менен жакында темир жол жана унаа каттамдарын жандандырууну чечкен;
Кыргызстандын салыктык башкаруу системасын өнүктүрүүгө көмөктөшүү макулдашылган;
Маданий-гуманитардык жана билим берүү чөйрөсүндө Россиянын ЖОЖдорунда өлкө жарандарынын билим алуу квоталарын 500дөн 700гө чейин көбөйтүү мүмкүнчүлүгүн карап чыгуу сүйлөшүлгөн;
Россиянын аймагында эмгектенген Кыргызстандын жарандарына ыңгайлуу шарттарды түзүү маселеси кеңири талкууланган;
8-10-июнда Екатеринбургда өтө турчу Кыргыз-Россия аймактар аралык конференциясынын алкагында өкмөттөр ортосунда 2022-2026-жылдары экономика жаатында кызматташуу программасына кол коюуну чечишкен.
Мындан тышкары, кеңешмеде эки мамлекеттин Финансы министрлигинин ортосундагы кызматташуу боюнча меморандумга кол коюлган.
Ошондой эле тараптар комиссиянын 24-кеңешмесин 2023-жылы Кыргызстанда өткөрүүнү макулдашты.
