Асанбеков: бала бакчага электрондук кезек өз максатына жеткен жок
© Sputnik / Асель Сыдыкова
Жазылуу
Бишкек шаардык кеңешинин депутаты, Социалдык саясат туруктуу комиссиясынын төрагасы Жаныбек Асанбеков борбордо бала бакчаларга электрондук каттоо киргизилгени менен коррупция токтогон жок деп эсептейт.
Билим берүү жана илим министрлиги бала бакчалардагы коррупцияны жоюу максатында электрондук тизме киргизген. Бирок анын техникалык жагын өздөрү көзөмөлдөбөй жеке менчик компанияга берип коюшкан. Мунун кесепетинен кайра эле директорлор менен жең ичинен сүйлөшүү, тизмеден алдыга жылдырып коюу сыяктуу коррупциялык аракеттер жасалып келет. Бул тууралуу Жаныбек Асанбеков Sputnik Кыргызстан радиосунда маек куруп жатып билдирди.
Асанбеков: бала бакчага электрондук кезек өз максатына жеткен жок
Анын пикиринде, министрлик борбор калаадагы бала бакчаларга электрондук каттоону шаардык бийликке өткөрүп берүүсү зарыл.
"Азыркы министр (билим берүү жана илим министри А. Бейшеналиев — ред.) макулдугун берип, Бишкектин бала бакчаларынын электрондук каттоосун шаар бийлигине өткөрүп алууга келишкенбиз. Бирок ал киши кызматтан кеткен соң кийинки келген министр бул келишимди жокко чыгарып койгон. Ал аралыкта Бишкек мэриясы каражат коротуп өзүнчө сервер да иштеп чыккан болчу. Эми ал чаң басып, колдонулбай жатат. Учурда Бейшеналиев кайрадан министр болуп дайындалды. Биз дагы бул боюнча сунушубузду жаңылап киргизели деп турабыз. Министрлик мунун ордуна орто мектептердин директорлорун дайындоодогу кадр маселесин аларга өткөрүп берүүнү сурап жатат. Бул иш чынында министрликтин колунда болгону дурус деп ойлойм. Анткени борбор калаада 15-20 жылдап директор болуп, мектепти менчигине айлантып алган жетекчилер жок эмес. Алардын артында депутаты же башка аткаминери турарын эл да билип калды, тактап айтканда, шаардык билим берүү башкармалыгын угушпайт. Андыктан бул саясатты министрликке өткөрүп берүү менен кадр саясаты жалпы республика боюнча бир жерден чечилгени туура болот. Буга биз деле каршы эмеспиз. Жакында министрге жолугам, ошондо бул эки тараптуу сунуштар талкууланат", — деди Асанбеков.
Эл өкүлү Бишкекте бала бакчага кезекке тургандар коррупциянын айынан баласы мектепке барып калганча күтүүгө мажбур болуп жатканын кошумчалады.
