22 млн. евронун дайыны жокпу? Бишкектеги таштанды жай боюнча комиссия түзүлөт
11:53 02.04.2022 (Жаңыртылды: 11:54 02.04.2022)
© Фото / пресс-служба Жогорку Кенеша
Жазылуу
Каражат 2013-жылы Европа өнүктүрүү банкынан алынган. Кечээ депутаттар көчмө жыйында анын кайда жумшалганын сураштырышкан.
БИШКЕК, 2-апр. — Sputnik. Бишкектин таштанды жайын иретке келтирүү максатында бөлүнгөн 22 миллион евронун кандай максатта иштетилгенин иликтөө үчүн депутаттык комиссия түзүлөт. Бул тууралуу Жогорку Кеңештин маалымат кызматы кабарлады.
Кечээ, 1-апрелде, Жогорку Кеңештин "Элдик" депутаттык тобу Бишкектеги таштанды төгүүчү жайда көчмө жыйын өткөргөн. Ага мэриянын тиешелүү жетекчилери катышып, таштанды маселелери менен аны чечүүнүн жолдору талкууланган.
![Кечээ, 1-апрелде, Жогорку Кеңештин "Элдик" депутаттык тобу Бишкектеги таштанды төгүүчү жайда көчмө жыйын өткөргөн. - Sputnik Кыргызстан](https://sputnik.kg/img/07e6/04/02/1063337433_0:90:960:630_600x0_80_0_0_63ee907d0715311a3465987d35fb795e.jpg "Кечээ, 1-апрелде, Жогорку Кеңештин "Элдик" депутаттык тобу Бишкектеги таштанды төгүүчү жайда көчмө жыйын өткөргөн.")
1/2
© Фото / пресс-служба Жогорку Кенеша
Кечээ, 1-апрелде, Жогорку Кеңештин "Элдик" депутаттык тобу Бишкектеги таштанды төгүүчү жайда көчмө жыйын өткөргөн.
2/2
© Фото / пресс-служба Жогорку Кенеша
Ага мэриянын тиешелүү жетекчилери катышып, таштанды маселелери менен аны чечүүнүн жолдору талкууланган.
1/2
© Фото / пресс-служба Жогорку Кенеша
Кечээ, 1-апрелде, Жогорку Кеңештин "Элдик" депутаттык тобу Бишкектеги таштанды төгүүчү жайда көчмө жыйын өткөргөн.
2/2
© Фото / пресс-служба Жогорку Кенеша
Ага мэриянын тиешелүү жетекчилери катышып, таштанды маселелери менен аны чечүүнүн жолдору талкууланган.
Депутаттар 2013-жылы таштанды төгүлүүчү жайды иретке келтирүү максатында Европа өнүктүрүү банкынан кредиттик жана гранттык негизде 22 миллион евро акча каражаты алынганын, азыр анын дайыны билинбей жатканын айтышкан.
Билдирмеде учурда каражаттын 10,5 миллион гана евросу иштетилип, бирок таштанды төгүлүүчү жайда көңүл жылытарлык иш жасалбаганы белгилүү болгону айтылат.
Парламент өкүлү Тазабек Икрамов муну иликтөө үчүн депутаттык комиссия түзүү керектигин билдирген.
"Каражаттын максатсыз иштетилгени коррупциялык жагдайлар бар экенин тастыктап турат. Бул үчүн депутаттык комиссия түзүп, каражаттын каякка пайдаланылганын тыкыр иликтеп чыгуу керек", — деген ал.
Депутат Жалолидин Нурбаев санитардык эрежелер сакталбагандыктан жарандардын ден соолугуна коркунуч жаралышы толук мүмкүн экенин айткан.
"Себеби бул жерде таштанды терген адамдар кечкисин коомдук унаалар менен шаардын туш тарабына барат. Эгер зыяндуу бактериялар болсо, ал жугуштуу ооруга айланып элге жайылышы ыктымал", — деген Нурбаев.
Андан соң көчмө жыйын Бишкек шаарынын мэриясында уланып, анда таштанды маселеси боюнча калаа башчысы Эмилбек Абдыкадыров маалымат берген.
"Таштанды төгүлүүчү жайга деп бөлүнгөн 22 миллион евро максатсыз иштетилген. Кайра иштетүү заводун куруу сунушу менен бир топ инвестор келген. Тилекке каршы, мурдагы мэрлер эмнегедир анын курулушуна кызыкдар болгон эмес. Азыр завод салуу ниетин билдирген инвесторлор менен сүйлөшүү иштери жүрүп жатат. Жыйынтыгын эки айдын ичинде билдиребиз", — деген мэр.
Жыйын соңунда каражаттын кайда кеткенин иликтөө максатында депутаттык комиссия түзүү чечими кабыл алынган.
Белгилей кетсек, Бишкектеги таштанды жайы 1978-жылдан бери колдонулуп келет. Убагында 400 миң кишиге эсептелген. Азыр борбордо миллиондон ашык киши жашайт.
