Жумагожоев: жасалма сүт ичкен ымыркай ашказан, ичеги ооруларына кабылат
© Sputnik / Асель Сыдыкова
Жазылуу
№3 шаардык балдар ооруканасынын кыска мөөнөткө дарылоо бөлүмүнүн педиатры Султан Жумагожоев эмчек эмген бала жетиштүү азык алгандыктан териси жылмакай болуп, салмагы, бою туура калыптанарын айтты.
Баланын туура тамактануусу түйүлдүк кезинде эле башталышы керек. Демек, аял кош бойлуу кезинде эле жетиштүү, пайдалуу азыктарды жеши зарыл. Эненин рационунда дан, жашылча-жемиштер, эт жана сүт азыктары болушу шарт. Бул тууралуу Султан Жумагожоев Sputnik Кыргызстан радиосунда маек куруп жатып билдирди.
Жумагожоев: жасалма сүт ичкен ымыркай ашказан, ичеги ооруларына кабылат
Анын айтымында, наристеге алты айга чейин энесинин сүтүнөн башка эч кандай кошумча тамак, суу дагы берүүнүн кереги жок.
"Эне сүтүндө баланын толук кандуу чоңоюшуна керектүү бардык микроэлементтер камтылган. Ошондуктан ымыркайды жарык дүйнөгө келгенден тарта эмчек сүтү менен багууну сунуштайбыз (эки жашка чейин же андан жогору). Эмчек эмген бала жетиштүү азык алгандыктан териси жылмакай болуп, салмагы, бою туура калыптанат. Ал эми жасалма сүт (смесь) менен тамактанган балада ашказан оорулары көбүрөөк катталат. Себеби беш кол тең эмес, бардыгы эле аралашманы даярдоодо гигиенаны сактай бербейт. Бала алты айга толгондо кошумча азык бере баштаса болот. Бууга, сууга бышырылган тамактар сунушталат. Таза, жаңы даярдалган азыктарды берсе баланын чоңоюусуна абдан жакшы. Жер-жемишти көбүрөөк колдонуу керек. Ошондой эле эт, сүт азыктарын пайдаланса болот. Мисалы, алгач 1-2 чай кашыктан баштаңыз. 7 айында азыктын көлөмүн көбөйтүп, бир жеген тамагынын көлөмүн 150 граммга чейин жеткириңиз (болжол менен 10 кашык). Балага картошка, сабиз, ашкабак, брокколи жана башка жашылчадан жасалган пюре, күрүч, гречка, жүгөрү, сулудан жасалган буламык берсе болот. 7-8 айынан баштап жогоруда айтылган тамактарга эзилген эт кошуңуз. Ошондой эле алма, алмурут, өрүк сыяктуу мөмө-жемиштерди кошсоңуз болот. 9-11 айлык баланын тамактануусу мурункудай эле, бирок тамакты эзбестен майда бөлүкчөлөргө туурап берүү керек (15 кашык). Тиши чыга баштаган наристе кесилген алма, сабизди өз колу менен кармап, чайнап жегенге аракет кылсын. Бөбөк бир жашынан баштап чоңдор менен дасторконго отуруп тамактанса болот. Эки жашка чейин наристенин мээси толук калыптанат. Андыктан балага дан, жашылча-жемиштер, эт жана сүт азыктарынан турган байытылган тамак берүү маанилүү", — деди Жумагожоев.
Ал балага таттуу, чипсы, кириешкинин ордуна кургатылган жемиш, как берүү керектигин кошумчалады.
