Турдубаева: Бишкекте мамлекеттик кызмат көрсөтүүнүн бир айлыгы жүрүүдө
10:39 14.03.2022 (Жаңыртылды: 10:41 14.03.2022)
Жазылуу
Санариптик өнүктүрүү министрлигинин Калкты каттоо жана жарандык абалдын актыларын каттоо башкармалыгынын башкы адиси Гүлбарчын Турдубаева техникалык паспорту бар тургундар уруксат берилбеген турак жайларга каттала алышарын айтты.
Бишкек шаарынын аймагында уруксат берилбеген жерлерге үйлөрүн салып жашап жаткан жарандардын көйгөйү чечиле баштады. Президент Садыр Жапаровдун тапшырмасы менен 18-февралда министрлер кабинетинин убактылуу жобосу чыгып, ага ылайык мамлекеттик кызматтарды көрсөтүүнүн бир айлыгын баштадык. Бул тууралуу Гүлбарчын Турдубаева Sputnik Кыргызстан радиосунда маек куруп жатып билдирди.
Турдубаева: Бишкекте мамлекеттик кызмат көрсөтүүнүн бир айлыгы жүрүүдө
Анын айтымында, иш-чарага Бишкек мэриясы, жергиликтүү башкаруу органдары, "Инфоком" мамлекеттик ишканасы, "Кыргыз почтасы" мамлекеттик ишканасы (ошол жерден акы төлөө үчүн) көмөк көрсөтүп жатат.
"Бишкекте Санариптик өнүктүрүү министрлигинин мобилдик топтору жер-жерлерде мамлекеттик кызматтарды көрсөтүүдө. Бул өнөктүк борбор калаада 9-марттан 31-мартка чейин шаардын бардык төрт районунда жана конуштарда өтөт. Анда калкты каттоо, жарандык абалдын актыларын жана жарандарды документтештирүү боюнча жеринде мамлекеттик кызмат көрсөтүлөт. Алсак, паспорт берүү, паспорттун мөөнөтүн узартуу, туулгандыгы, өлгөндүгү тууралуу күбөлүк жана башка ушул өңдүү документтер берилет. Ошондой эле райондук аскер комиссариаты тартылып, алар аскер билетин алуу жаатында кеңештерин берип, каттоого алууда. Демек, уруксат берилбеген жерлерде салынган үйлөрдүн тургундары гана эмес, бардык жарандар мамлекеттик кызматты ала алат. Санариптик өнүктүрүү министрлигинин алдындагы Калкты жана жарандык абалдын актыларын каттоо департаментинин жооптуу кызматкерлеринен мобилдик топтордун борборлору түзүлүп, алар керектүү жабдыктар менен жер-жерлерге барышты. Эске салсак, эми техникалык паспорту бар тургундар уруксат берилбеген турак жайларга каттала алышат. Мобилдик топ элди 09:00дөн 18.00гө чейин кабыл алат. Андан тышкары, Баткен (2 миңдей жаран кызмат алды), Чүй облусу боюнча мамлекеттик кызматтарды көрсөтүп келет", — деди Турдубаева.
Ал мобилдик топтор иштеген борборлор улам жылып турарын эскертип, жаңы даректерди 119 номерине чалып билсе болорун кошумчалады.
