Абылов: техникалык кесипке кызыккан балдардын санын арттырууну көздөйбүз
© Sputnik / Асель Сыдыкова
Жазылуу
"Алтын түйүн" балдар инженердик-техникалык академиясынын директорунун орун басары Кубанычбек Абылов республикалык илим, техника жана өндүрүш жумалыгынын максатын түшүндүрүп берди.
СССР мезгилинде "Бүткүл союздук өндүрүш жумалыгы" деген аталышта илим жана техника жаатында иш-чара уюштурулчу. Каникул убагында окуучулардын чыгармалары көргөзмөгө коюлуп, мамлекеттик органдар, ЖМКлар ушул жумалыкты өткөрүүгө жардамдашчу. Эң күчтүү балдар республикага келип, жеңүүчүлөр аныкталып, 40-50 бала поезд менен Москвага барып Эл чарбасынын жетишкендиктеринин көргөзмөсүнө (ВДНХ) катышмак. Жумалык эгемендүүлүктү алгандан кийин өткөрүлбөй калды. Бул тууралуу Кубанычбек Абылов Sputnik Кыргызстан радиосунда маек куруп жатып билдирди.
Абылов: техникалык кесипке кызыккан балдардын санын арттырууну көздөйбүз
Анын айтымында, 2006-жылы Билим берүү жана илим министрлигинин демилгеси менен республикалык илим, техника жана өндүрүш жумалыгы кайрадан уюштурула баштаган.
"2022-жылы Кыргызстандын мектеп окуучулары үчүн илим, техника жана өндүрүш жумалыгы 7-12-февраль күндөрү өтүүдө. Аталган иш-чараны он жылдан ашык убакыттан бери Билим берүү жана илим министрлиги жана "Алтын түйүн" улуттук балдар инженердик-техникалык академиясы өлкөдө окуучу балдар үчүн илимий изилдөөлөрдүн жана өндүрүштүн кызыктуу дүйнөсүн ачуу максатында өткөрүп келет. Бүгүнкү күндө Кыргызстан өнөр жай менен өндүрүштү кайра жандантууга жана активдүү өнүктүрүүгө муктаж, бирок жаңы технологияларсыз жана квалификациялуу кадрларсыз буга жетишүү мүмкүн эмес. Андыктан аталган жумалык табигый-математикалык дисциплиналарга жана техникалык багыттагы кесиптерге кызыккан балдардын санын арттырат. Иш-чаранын алкагында тегерек столдор, дүйнөлүк илимдин жана техниканын жетишкендиктери жөнүндө лекциялар, изилдөөчүлүк жана ойлоп табуучулук долбоорлордун конкурстары, интеллектуалдык оюндар жана викториналар өткөрүлүүдө. Андан тышкары, Чолпон-Ата шаарында 8-10-февраль аралыгында мектеп окуучуларынын "Илим + Ойлоп табуу = Техника!" аттуу республикалык илимий-техникалык олимпиадасы болуп өттү. Ага Кыргызстандын бардык облустарынан 10 команда, жалпы 100дөн ашык бала катышты. Мектептик жана кенже лигалар үчүн олимпиада үч этапта өттү. Мында эң негизгиси, жаш инженерлер поезддерди тар темир жолдон кенен жолго жана кайра тескери нукка которуунун азыркы моделин иштеп чыгышты. Экономиканы инженерлер көтөрөт. Келечектин инженерлери мына ушул балдар", — деди Абылов.
Ал республикалык илим, техника жана өндүрүш жумалыгы экономиканын өнүгүшүнүн жана гүлдөшүнүн негизи болгон өлкөнүн илимий жана өндүрүштүк жашоосуна жаш муундардын кызыгуусун арттыруу үчүн кубаттуу түрткү экенин кошумчалады.
