Исаков: БУУнун майыптар конвенциясы өлкөдө жакшы ишке ашпай жатат
© Sputnik / Асель Сыдыкова
Жазылуу
"Майыптарга юридикалык жардам көрсөтүү" фондунун президенти Толкунбек Исаков өлкөдө БУУ тарабынан кабыл алынган майыптардын укугу боюнча конвенция жеткиликтүү деңгээлде колго алынбай жатканын айтты.
Буга чейин мамлекет майыптарга жөлөк пул берүү, аны көбөйтүү менен алектенип келсе, бүгүнкү күндө "балык эмес, кайырмак берүү" керек болуп турат. Башкача айтканда, алардын азыркы муктаждыктарын камсыздаганга аракет кылбай, татыктуу билим алып, спорт менен алектенип, коомдун толук мүчөсү катары жашоосуна шарт түзүү зарыл. Мындай пикирин Толкунбек Исаков Sputnik Кыргызстан радиосунда маек куруп жатып билдирди.
Исаков: БУУнун майыптар конвенциясы өлкөдө жакшы ишке ашпай жатат
Анын айтымында, учурдун дагы бир курч көйгөйү майыптыгы бар адамдарга болгон коомдун туура эмес көз карашы болууда.
"2019-жылы БУУнун майыптыгы бар адамдардын укугу тууралуу конвенциясы ратификацияланган. Ушунун алкагында азыркы министрлер кабинетинин алдында атайын кеңеш түзүлгөн. Бул биздин коомдогу ден соолугунан мүмкүнчүлүгү чектелген адамдар үчүн чоң жетишкендик. Тилекке каршы, башка азырынча алгылыктуу иш жасала элек. Кеңештин төрагасы болуп министрлер кабинетинин жетекчиси, тактап айтканда, Акылбек Жапаров эсептелет. Анын орун басары катары жарандык коомдон мен шайлангам. Кеңеш квартал сайын чогулуп майып адамдардын маселелерин талкуулап турат. Мисалы, март айында майыптыгы бар адамдардын спорт менен алектенүүсү талкууга коюлат. Бирок учурда талкуудан чыгып көзгө көрүнгөн иш жасай элекпиз. Буга ар кандай себептер бар. Ошол эле мамлекеттик органдардын, коомчулуктун майыптарга болгон мамилеси биринчи себеп десек болот. Анткени биздин элге майыптар менен бир гана Социалдык коргоо министрлиги алектениши керек деген түшүнүк сиңип калган. Ошол эле Билим берүү, Саламаттык сактоо министрликтери жана башка тармактын адистери да ушинтип ойлошот. Бирок майыптарга жөлөк пул чегерип коюп, аларды көз карандуулукка түртпөй, билим берип, спорт менен алектенип, билим алуусуна шарт түзүү, алар өздөрү иш менен камсыз болуп, коомдук жашоого толугу менен аралашууга алып келүү керек. Муну коомчулук дагы түшүнүшү зарыл", — деди Исаков.
Ал майыптардын социалдык маселелерин түшүнүктүү коом менен чечүү алда канча жеңил болорун кошумчалады.
