Психолог: эркектер да төрөттөн кийинки депрессияга кабылат
© Фото / Аскат Чыналы
Жазылуу
Педагог-психолог Айнек Муратбекова төрөттөн кийинки депрессияга аялдардын 15 пайызы кабыларын айтты.
Британиялык окумуштуулардын изилдөөсү боюнча, ата статусуна ээ болгон эркектердин 3,6 пайызы төрөттөн кийинки депрессияга кабылат. Бул тууралуу Айнек Муратбекова Sputnik Кыргызстан радиосунда маек куруп жатып билдирди.
Психолог: эркектер да төрөттөн кийинки депрессияга кабылат
Анын айтымында, мындай көрүнүш көбүнесе өтө жоопкерчиликтүү эркектерден байкалган.
"Аялдардагы төрөттөн кийинки гормоналдык өзгөрүү, өз келбетин кабыл алуу учуру "бэби блюз" (Baby Blues) деп аталат. Адатта эки жумадан эки айга чейин созулат. Бул абалды төрөттөн кийинки депрессия менен чаташтырбоо керек. Анткени "бэби блюз" бардык эле аялдардын башынан өтөт, бирок андан өрчүп кеткен учурда депрессияга кабылат. Эне макамына жаңыдан ээ болгон аяллдардын 15 пайызы төрөттөн кийинки депрессияга чейин жетери аныкталган. Бул учурду айрым эркектер да өз башынан өткөрөрү белгилүү. Британиялык окумуштуулар жаңыдан ата болгон эркектердин 3,6 пайызы төрөттөн кийинки депрессиядан өтөрүн аныкташкан. Адатта бул өтө жоопкерчиликтүү эркектер же аялдар ушул депрессиялык абалга кептелгендер. Эркектер аялдардай болуп гормоналдык өзгөрүүлөргө дуушар болбогону менен социалдык өзгөрүү, экономикалык жоопкерчилик же аялынын төрөттөн кийинки депрессиялык абалы ушуга алып келери белгилүү болгон. Мындай учурда психологдорго кайрылгандан тартынбаш керек", — деди Муратбекова.
Психолог аялдар төрөттөн соң "бэби блюз" учурунда күйөөсүнүн көңүл буруусун мурдагыдан он эсе көп талап кылып каларын кошумчалады.
