Кусеинова: олимпиададан жеңген окуучулар ЖОЖго тапшырууда жеңилдик алат
© Sputnik / Асель Сыдыкова
Жазылуу
Билим берүү жана илим министрлигинин Мектеп, мектептен тышкаркы жана кошумча билим берүү башкармалыгынын жетектөөчү адиси Айнура Кусеинова окуучулар арасындагы олимпиадалар тууралуу айтып берди.
Республикалык олимпиада 12, улуттук олимпиада беш предмет боюнча жыл сайын өткөрүлөт. Бул тууралуу Айнура Кусеинова Sputnik Кыргызстан радиосунда маек куруп жатып билдирди.
Кусеинова: олимпиададан жеңген окуучулар ЖОЖго тапшырууда жеңилдик алат
Анын айтымында, учурда республикалык олимпиаданын үчүнчү этабына даярдыктар көрүлүүдө.
"Жыл сайын окуучулар арасында 12 предмет боюнча республикалык олимпиада өткөрүлөт. Ал мектептик, райондук, облустук жана республикалык болуп төрт этаптан турат. 13-14-январда республикалык олимпиаданын экинчи этабы райондук деңгээлде болду. Ага биринчи этаптан 1-2-3-орунду ээлегендер катышты. Учурда үчүнчү этапка даярдыктар көрүлүүдө. Андан тышкары, үч жылдан бери математика, физика, химия, биология жана информатикадан улуттук олимпиада уюштурулуп келүүдө. Мунун жеңүүчүлөрү эл аралык олимпиадаларга катышууга мүмкүндүк алат. Буга чейин эки жыл аралыгында улуттук олимпиада сынамык иретинде жүргүзүлүп, жакшы натыйжаларды берди. Өзгөчө 2021-жылы биздин окуучулар Азербайжанда өткөн олимпиадада математика боюнча бир күмүш, төрт коло медаль алды. Мындан тышкары, Ирандагысынан геометрия боюнча алтын жана эки күмүш медалды багындыра алдык. Олимпиададан жеңген окуучулар ЖОЖго тапшырууда жеңилдиктерге ээ боло алат. Бирок алардан ЖРТнын жыйынтыктары талап кылынат", — деди Кусеинова.
Ошондой эле ал олимпиадалардын негизги максаты жалпы билим берүү уюмдарындагы зээндүү балдарды аныктоо, билим сапатын жогорулатуу жана педагогдорду, окуучуларды шыктандыруу болуп саналарын кошумчалады.
