Психолог: Baby Blues — бул төрөттөн кийинки депрессия эмес
© Фото / предоставлено Айнек Муратбековой
Жазылуу
Педагог-психолог Айнек Муратбекова төрөттөн кийинки депрессиянын симптомдору жана андан арылуу тууралуу айтып берди.
Көп учурда аялдар бэби блюз (Baby Blues) менен төрөттөн кийинки депрессияны алмаштырып алышат. Анткени экөөндө окшоштуктар бар. Бул тууралуу Айнек Муратбекова Sputnik Кыргызстан радиосунда маек куруп жатып билдирди.
Психолог: Baby Blues — бул төрөттөн кийинки депрессия эмес
Анын айтымында, төрөттөн кийинки депрессияга аялдардын 15 пайызы гана кабылат.
"Биз бир иш жасарда ага даярданабыз. Бала төрөлөрдө да материалдык даярдыктан сырткары ата-эне психологиялык да даярдыктан өтүүсү зарыл. Адатта төрөттөн кийинки депрессия аябай чоң нерсе күтүп, ага жетпей калганда пайда болот. Мисалы, бала төрөлөрү менен эле идеалдуу эне, жар болууну кыялданып жүрүп, чыныгы турмушта аны аткара албай жаткан учурда көз жарган эне депрессияга кабылышы мүмкүн. Негизинен депрессиянын үч даражасы бар. Биринчиси — бул бэби блюз. Муну депрессия деп айтууга болбойт. Анткени төрөттөн кийин 2-3 күн аралыгында пайда болуп, эки жумага, өтө сейрек учурда эки айга созулат. Бэби блюз же болбосо төрөттөн кийинки муң-кайгынын симптомдору уйкусуздук, чарчоо, маанайдын бат-бат бузулушу, себепсиз көп ыйлоо, баласына, өзүнө тынчсыздануу болуп эсептелет. Бул этапты аял өзүнүн өзгөргөн келбетин, организмин кабыл алып жатат деп түшүнсөк болот. Экинчиси — төрөттөн кийинки депрессия, мындан соң психотикалык депрессия. Төрөттөн кийинки депрессияга жаңы төрөгөн энелердин 15 пайыздайы гана кабылат, калганы бэби блюз этабы менен эле калыбына келип калат. Аял төрөттөн кийинки абалын улам жакшырып баратканын же, тескерисинче, кайгысы тереңдеп жатканын жакшы сезет. Бул убакытта ага эмоционалдык колдоо көрсөтүп туруучу жакындарынын мамилеси абдан маанилүү", — деди Муратбекова.
Психолог төрөттөн кийинки депрессияга аялдар тун перзентин төрөгөндө эле эмес, кийинки төрөттөрүндө деле кабылуусу мүмкүндүгүн кошумчалады.
