Баланын дене табын кантип туура түшүрүү керек. Дарыгердин кеңеши
15:59 19.10.2021 (Жаңыртылды: 14:27 14.12.2021)
© Sputnik / Александр Кряжев
/ Жазылуу
Балдардын тез жардам клиникалык ооруканасынын башкы дарыгеринин орун басары температураны кантип түшүрүү керектигин түшүндүрдү.
БИШКЕК, 19-окт. — Sputnik. Балдардын тез жардам клиникалык ооруканасынын башкы дарыгеринин дарылоо иштери боюнча орун басары Жамиля Анакеева балдарга дары-дармекти кантип туура берүү боюнча бир катар кеңештерин айтты.
Балдардын тез жардам клиникалык ооруканасынын башкы дарыгеринин дарылоо иштери боюнча орун басары Жамиля Анакеева
Ал Sputnik Кыргызстан агенттигинин маалымат борборунда өткөн "Балдар арасындагы сасык тумоо. Кичинекейлерди коронавирустан кантип коргойбуз?" деп аталган брифингге катышкан.
Анакеева төмөнкүдөй кеңештерди берди:
- дене табы 38,5 градустан жогору болгон учурда температураны түшүрүүчү дарыларды берсе болот, бирок аны бала чыдабай калган учурда гана берүү керек;
- балага дары-дармекти өзү билемдик менен эле бере бербеңиз, дарыгерге кайрылыңыз, ал сизге препараттардын дозасы жана дарыны ичүү убактысын айтып берет;
- дары ичүүдөгү аралыкты так сактаңыз, антпесе кадимки парацетамол деле боорго зыян алып келиши мүмкүн. Баса, парацетамолду ичүүнүн аралыгы алты сааттан кем болбош керек;
- баланы катуу орогонго да болбойт, анткени ошондон улам температура түшпөй калышы мүмкүн;
- бала суюктук ичүүдөн баш тартса да көп суюктук ичирүү зарыл. Температура жогорулаганда баланын денесиндеги суюктук азаят, ошого жараша кан коюуланат. Ошондой эле суюктукту температураны түшүрүүчү дарыны берерден мурда ичирүү керек. Жетиштүү өлчөмдөгү суюктуктун жардамы менен жөтөл жеңилдеп, температура төмөндөйт.
Анакеева ошол эле учурда, ооруп калганда температуранын маанилүүлүгүн баса белгиледи.
"Температураны 36,6 градуска, башкача айтканда, кадимки деңгээлге түшүрүүгө аракеттенүүнүн зарылчылыгы жок. Дал ошол дене табы жогорулаган учурда организмде интерферон иштелип чыгат. Баланын температурасы көтөрүлгөнү абдан жакшы симптом, баарында эле, айрыкча иммунитети төмөн балдарда мындай боло бербейт. Баланын дене табынын көтөрүлүшү — бул жакшы көрүнүш. Биринчиден, бала ооруп жатканын айтат, экинчиден, температура денедеги вирустарды өлтүрөт", — деп түшүндүрдү Анакеева.
Ал белгилегендей, эгерде ата-эне балага температураны түшүрүүчү дарыны такай берип келсе, анда организм инфекциялар менен өз алдынча күрөшүүнү токтотот, бул абалды кыйындатат. Дарыны ыксыз эле ичире берүүгө болбойт, бирок талма илдетине чалдыгып калбаш үчүн тең салмактуулукту сактоо маанилүү.
