Аскеров: жашы өткөн кыздар гормоналдык контрацепция колдонушу керек
14:20 05.10.2021 (Жаңыртылды: 14:27 14.12.2021)
© Sputnik / Эркин Садыков
Жазылуу
Кыргызстандагы акушер-гинеколог жана неонатологдор ассоциациясынын президенти, медицина илимдеринин доктору, профессор Арсен Аскеров жашы өтүп балалуу боло элек кыздар гормоналдык контрацепция ичиши керектигин айтты.
Эрте же кеч кош бойлуу болгондор же экинчи никесинен боюна бүткөн келиндерде тондун оорусу (преэклампсия) көп кездешүүдө. Бул аялды өлтүрөт же майып кылат, түйүлдүккө да терс таасир этет. Ошондуктан бул аялдар кош бойлуулукка жакшылап даярданышы зарыл. Бул тууралуу Арсен Аскеров Sputnik Кыргызстан радиосунун эфиринде маек куруп жатып билдирди.
Аскеров: жашы өткөн кыздар гормоналдык контрацепция колдонушу керек
Анын айтымында, азыр жыныстык жол аркылуу жугуучу көп оорулар симптомсуз өрчүп жатат. Андыктан оору жугузуп албоо үчүн сексуалдык жүрүм-турумду көзөмөлдөө керек.
"Балалуу болууга даярдануу же контрацепция колдонуу жоопкерчилигин эркектер аялдарга жүктөп койгон. Биздин менталитеттен улам, жалпы калктын түшүнүгү, билимдин аздыгынан бул нерсеге көңүл бөлө беришпейт. Жадагалса элетте сөз болом деп жөнөкөй эле презерватив сатып алуудан уялган эркектер бар. Эгерде пландалбаган кош бойлуулуктун, туруктуу өнөктөш болбосо жыныстык жол аркылуу оору жугузуунун алдын алуу үчүн сөзсүз презерватив колдонуу зарыл. Учурда карьера деп балалуу болууну арткы планга койгон кыздар ай сайын айыз келгенде организмин талкалай бербей, коргонуу үчүн жакшы гормоналдык контрацепция колдонушу керек. Мурдагыдай контрацепция ичсем башка органдарым талкаланат деп коркпогула. Ооба, илгерки таблеткалардын пропорциясы, дозасы туура эмес болгондуктан кооптуу болчу. Ал эми азыр фармкомпаниялар илимий жактан жакшы изилденип иштелип чыккан дарылоочу жөндөмгө ээ каражаттарды чыгарып жатат. Мисалы, аталган таблеткалар ичеги, жумуртканын, жатындын рагын алдын алат. Ошону менен бирге териси, мээси тазаланып жакшы урук даярдалат. Бул мырзаларга да тиешелүү", — деди Аскеров.
Дарыгер гормоналдык таблеткаларды адистин кеңеши менен кабыл алуу керектигин кошумчалады.
Подкасттын толук вариантын төмөнкү видеодон көрүңүз:
