Кыргызстан – Япония ортосунда мамлекеттик башкаруу системасында кадрлардын билим сапатын жогорулатуу боюнча түзүлгөн атайын келишим бар. Анын негизинде JDS программасы каралып, аталган өлкөгө жылына Кыргызстандан 18 магистрант жана эки докторлук даражада билим алууга мамлекеттик кызматкерлер жөнөтүлөт. Бул тууралуу Медербек Исраилов Sputnik Кыргызстан радиосундагы маегинде билдирди.
Исраилов: мамлекеттик кызматкерлердин Японияда акысыз окуу мүмкүнчүлүгү бар
Анын айтымында, JDS программасы боюнча англис тилин мыкты билген, мамлекеттик же муниципалдык кызматта иштеген 40 жашка чейинки кызматкерлер бара алат.
"JDS программасы кыргыз тарап Япониядан мамлекеттик башкаруу багытында тажрыйба алышы үчүн каралган долбоор. Мунун алкагында бизден жылына 20 адам барып билим алып келет. Алар атайын сынактан өткөн соң Японияда эки жыл окушат. Окутуулар англис тилинде жүргүзүлгөндүктөн бул тилди мыкты билгендер талап кылынат. Бардык чыгымдарды япон тарап төлөйт. Эгер жөнөп жаткан стипендиант үй-бүлөлүү болсо бардык үй-бүлө мүчөлөрүн да алып кете алат. 2-3 баласы менен барып окугандарды кезиктирип жүрөбүз. Алардын мектепке жана бала бакчага орношуп, тарбия, билим алышын окуткан тарап өзү көзөмөлдөйт. Эки жылдык окуу мөөнөтү аяктаган соң алар стипендиант учуп кеткенге чейин тыкыр байкоого алып турушат. Башкача айтканда, калып же иштеп кетүү мүмкүнчүлүгү берилбейт. Эгер бизден барган кадрлар кандайдыр бир себептерден улам окуусун таштап салса, анда кеткен чыгымдарды кыргыз өкмөтү төлөп бериши керек болот. Аталган программа менен мамлекеттик башкаруу багытында, финансист, экономист, эколог же муниципалитеттин кызматкерлери бара алат. Артыкчылык кыз-келиндерге жана аймактан келгендерге берилет", — деди Исраилов.
Ал ошондой эле окууга кеткен кызматкердин бул жактагы жумуш орду келгенче сакталып турарын жана Япониядан келген соң үч жыл мамлекетке иштеп берүүгө милдеттенерин кошумчалады.
