БИШКЕК, 22-сен. — Sputnik. Мамлекеттик-жеке өнөктөштүк борборунун (МЖӨ) директору Санжарбек Болотов Кыргызстанда кандай МЖӨ долбоорлору пландалып жатканын айтып берди.
Ал Sputnik Кыргызстан агенттигинин мультимедиалык маалымат борборунда өткөн брифингге катышты.
Жакынкы аралыкта ишке ашыруу пландалып жаткан долбоорлордун тизмеси:
- Бишкектеги унаа токтотуучу жайлар. Жакында эле мэриянын жетекчилиги менен тил табыштык. Чет элдик компаниялардын кызыгуусу бар. Алар унаа токтотуучу жайларды ар кандай ыкмалар менен уюштурууну сунуштап жатышат. Эми сынак жарыяланса бул долбоор боюнча иш башталат;
- Муниципалдык мончолор. Кеп Жибек Жолу проспекти менен Абдрахманов көчөсүнүн кесилишиндеги иштебей турган имарат жөнүндө болууда. Жеке сектордун кызыкчылыгы жана мэриянын долбоорду алдыга жылдыруу боюнча чечими бар;
- Компьютердик томография кызматтары. Жакынкы аралыкта бизнес мамлекеттик бейтапканаларда жана республикадагы бардык ооруканаларда томография бөлүмүн ачуусу үчүн сынак жарыяланат;
- Нарын облусунда логистикалык борбордун курулушу. Сынак жакында аякташы керек. Анын айтымында, чет элдик олуттуу компания да арыз берди. Жакында жеңүүчү аныкталат;
- Мамлекеттик мекемелердин имараттарынын фондун реконструкциялоо боюнча долбоорлор. Эки университет менен байланышкан, бизнестин кызыкчылыгы бар;
- Лотерея ишмердүүлүгү. Мамлекеттик компания болгону менен чыгым тартып жатат. Буга байланыштуу өзүнүн ресурстары жана технологиялары менен келе турган операторду тартуу каралууда.
"Жакынкы аралыкта ири долбоорлорду даярдоо пландалып жатат. Узак убакыттан бери аэропортту жаңыртуу боюнча талкуу жүрүп келет. Мындан сырткары, Төө-Ашуу аркылуу өтө турган акы төлөнүүчү туннелдин курулушу боюнча долбоор дагы бар", — деди борбордун жетекчиси.
Ал ошондой эле бала бакча жана медклиникаларды түзүү боюнча дагы бир нече чакан долбоорлор иштелип жатканын кошумчалады.
