БИШКЕК, 10-сен. — Sputnik. Стюардессалар учакка кирип келе жаткан ар бир жүргүнчү менен эмнеге учурашарынын сырын ачып беришти. Бул туурасында The Sun басылмасы жазды.
Жогорудагыдай кесиптин ээси Кэт Камаланинин айтымында, кеп сыпайылыкта гана эмес.
"Учакка кирип келе жатканда да, отурганда да биздин жылмайып турганыбызды көрөсүздөр. Бул учурда чынын айтсак, башыңыздан бутуңузга чейин карап, байкоо жүргүзүп, ABP (ишке жарамдуу) издеп жаткан болобуз. Кокус чукул кырдаал жаралып калса, ал адам бизге жардам бергендей болушу керек", — деген ал.
12 жыл стюардесса болуп эмгектенген Кэрри Брэдли жүргүнчүлөрдүн абалын, ден соолугун тез арада көздөн өткөрүп чыгарын айткан.
"Эшиктин алдында туруп жүргүнчүлөр менен жаркылдап учурашып жатканда алардын абалын, дени сактыгын, алдуу-күчтүү экендигин бир көз жүгүртүп чыгуу менен байкап калууга жетишем", — деген борт коштоочу.
Ал асманда бара жатканда жүргүнчүлөр менен сүйлөшүп, кирип келе жатканда байкагандарын, чукул кырдаалда чын эле жардам берүүгө жараар-жарабасын дагы бир ирет текшерип аларын кошумчалаган.
