БИШКЕК, 4-сен. — Sputnik. Бириккен Араб Эмиратынан келген MASDAR компаниясы Кыргызстанда күн электр станцияларынын курулушу үчүн инвестиция салууга кызыгып жатат. Бул тууралуу Энергетика жана өнөр-жай министрлигинин маалымат кызматы кабарлады.
Энергетика жана өнөр-жай министрликтин жана энергокомпаниялардын өкүлдөрү Бириккен Араб Эмираттарынан келген делегация менен жолугушкан.
© Фото / пресс-служба Министерства энергетики и промышленности
Билдирмеге караганда, министрликтин жана энергокомпаниялардын өкүлдөрү Бириккен Араб Эмираттарынан келген делегация менен жолугушкан. Анда энергетика тармагында кызматташуу маселеси талкууланып, кыргыз тарап өлкөдөгү ири долбоорлор боюнча маалымат берген.
"Сүйлөшүүнүн жүрүшүндө БАЭ энергиянын кайра жаралуучу булактары боюнча Кыргызстандын дарамети жогору экенин айтып, MASDAR компаниясы Кыргызстанда күн электр станцияларын куруу үчүн инвестиция салууга кызыгып жатканын белгилешкен. Аталган компания Өзбекстанда күндүн нуру менен иштеген электр станциясына 110 миң доллар инвестиция салган", — деп айтылат маалыматта.
Жолугушуунун соңунда эки өлкөнүн энергетика министрлери кызматташуу боюнча меморандумга кол коюшкан. Эми тараптар документтин долбоорун даярдоо боюнча иш жүргүзө турганы кошумчаланды.
