Анализдин соңунда Сыдыков манас айтууда жогорку эмоционалдык эргүүгө (транс) кирип, жан дүйнөсү менен берилип, руханий абалда болгондуктан организми катуу стрессти көтөрө алган деген тыянак чыкты. Бул тууралуу Бегимжан Дүйшеева Sputnik Кыргызстан радиосунун эфиринде маек куруп жатып билдирди.
Дүйшеева: 14 сааттан ашык манас айткан Сыдыковдун абалы иликтенди
Анын айтымында, узак убакыт манас айтуу жалпы организмди курч стресске кептеген.
"Манасчы Дөөлөт Сыдыков былтыркы жылдын ноябрь айында манас айтканга чейин жана айткандан кийинки ден соолугундагы өзгөрүүлөрдү салыштыруу максатында эки жолу шилекей жана кан үлгүсүн алганбыз. 14 саат 27 мүнөт тынымсыз, тамак-аш, суу ичпестен манас айтууда организм стандартка жатпаган стресстик абалга туш болду. Стресс кортизол гормону, тропонин белогу, глюкоза, лактат, холестериндин жалпы көрсөткүчтөрүнө таасир этет. Негизи стресстин физиологиясы тынчсыздануу реакциясы, андан кийин каршылык стадиясы (организм ага ылайыкташа баштайт) жана чарчоо баскычы деп бөлүнөт. Анализдин жыйынтыгында манасчынын физиологиялык абалы бир дагы стадияга дал келген жок. Себеби кортизол көтөрүлүп, иммундук системанын көрсөткүчтөрү (лейкоцит, ак денечелер, эозинофилдер) нормадан ашык болуп, каршылык көрсөтүп турушту. Манасчыда бул учурда канында тромбоциттердин бир аз көбөйүшү байкалды. Жүрөк-кан тамыр системасынын көрсөткүчтөрү, кан басымы нормада болду. Эң негизгиси, стресс учурунда кычкылтек жетпей анаэробдук кычкылдануунун негизинде организмде ацидоз, башкача айтканда, сүт кислотасы көбөйүп кетет. Бул өлүмгө чейин алып келүүчү абал. Манасчы дал ушундай абалга жеткен. Бирок анын организми буга туруштук бере алган", — деди Дүйшеева.
Дарыгер манасчы Сыдыковдун беш күн, беш түн манас айткан соң организми сөзсүз түрдө стресс аларын, азыр болбосо кийин кесепети болорун кошумчалады.
