БИШКЕК, 18-авг. — Sputnik. 21-августта Жер планетасына кооптуу делген 2016 AJ193 астероиди жакындайт. Бул тууралуу Москва планетарийине таянып РИА Новости жазып чыкты.
Астроном адистери ал Жердин жанынан учуп өтөрүн белгилешти.
"Жерге жакындаган астероиддер" деп аталган асман телолорунун бүтүндөй бир классы бар. Алардын жакынкы келечекте Жер планетасына 7,5 миллион чакырым же андан да жакындай ала тургандары коркунучтуу объектилер деп эсептелет. NASA уюмунун эксперттеринин айтымында, 2016 AJ193 астероиди 21-августта Жерге болжол менен 3,4 миллион чакырым жакындайт. Анын көлөмү болжол менен 1,4 чакырым деп эсептелүүдө", — деп айтылат планетарийдин билдирүүсүндө.
Тарыхта буга чейин астероиддердин Жерге бир кыйла жакын учкандары да болгон. 2011-жылы көлөмү 100 жана 360 метр болгон эки асман телосу Жер планетасына 384 миң чакырым жакындаган.
Илимпоздор астрономдор тарабынан байкалбаган асман телолору эң коркунучтуу экенин белгилешет. Алар Жерге кулагандан кийин гана билингени үчүн кооптуу болуп саналат. Бул — Тунгус феномени жана Челябинск метеорити. Биринчи учурда Подкаменная Тунгуска дарыясында болгон чоң жарылуунун натыйжасында 2 000 чарчы чакырымдан ашык аянттагы токой кыйраган. Экинчи учурда асманда болгон жарылууларда жергиликтүү тургундар айнектин сыныктары тийип жаракат алышкан. Планетарийдин адистери мындай учур болжол менен жүздөгөн жылдарда бир жолу болорун белгилешет.
