БИШКЕК, 13-авг. — Sputnik. Базар-Коргон районунда эки жаштагы бөбөк унаанын алдында калып көз жумду. Бул тууралуу Жалал-Абад облустук ички иштер башкармалыгынын маалымат кызматы билдирди.
Билдирмеге караганда, окуя 11-август күнү саат 19:00дөр чамасында болгон. Анда Базар-Коргон районунун Аук айылында Э.Ш. аттуу 25 жаштагы жигит Honda Fit үлгүсүндөгү унаасын жууп, жылдырып жаткан учурда бир тууган агасынын эки жаштагы Х.А. аттуу кызы дөңгөлөккө кыпчылып калган.
"Бөбөк Базар-Коргон райондук оорукананын жандандыруу бөлүмүнө жаткырылган. Бирок эртеси, 12-августта, өзүнө келбей эки жашар кыз чарчап калган", — деп айтылат маалыматта.
Окуя боюнча көз жумган кыздын ата-энеси эч кимге доосу жок экендигин айтып, арыз жазуудан баш тартканы кошумчаланды.
