Эми кыргыз жарандары Россияга "COVID-19суз саякаттайм" тиркемеси жок кире албайт. Бул тууралуу Жылдыз Айгерчинова Sputnik Кыргызстан радиосунда маек куруп жатып билдирди.
Айгерчинова: эми Россияга "COVID-19суз саякаттайм" тиркемеси жок кире албайбыз
Анын айтымында, тиркемеде ПЦР-тесттин жыйынтыгы жана эмдөө тууралуу маалымат бар.
"ЕАЭБге мүчө-өлкөлөр "COVID-19суз саякаттайм" тиркемесин колдонууда. Аны Google Play же App Store аркылуу көчүрсө болот. Июль айынан тарта кирген өзгөрүүлөргө ылайык, эми кыргыз жарандары бул тиркемеси жок Россия Федерациясына кире албайт. Ошондуктан аталган өлкөгө бара турган жарандар лабораториядан тийиштүү анкетаны толтуруп, макулдугун бериши керек. Андан соң бланктагы QR-кодду көчүрүп алуу зарыл. Эгер ПЦР-анализ терс натыйжада болсо код жашыл түстө, оң натыйжа менен чыкса кызыл түстө болот. Ошону көрсөтүп чек арадан өтүүгө мүмкүндүк алат. Тиркемени колдонуу абдан ыңгайлуу. Справка, кагаз анализди көтөрүп жүрбөстөн маалыматты телефондо сактап жүрөсүз. Бул жерде белгилеп кете турган жагдай, жаран кайсы паспорт менен сыртка чыга турган болсо, ошол документти лабораторияга бериши керек. Болбосо ички жана жалпы жарандык паспорттун экөөн тең жанында алып жүрүүсү зарыл. Учурда тиркемеге үч мамлекеттик жана алты жеке лаборатория кошулду. Тиркеме жарандарга эң жакынкы лабораторияны автоматтык түрдө сунуштайт. Учурда "COVID-19суз саякаттайм" аркылуу күнүнө 2-2,5 миңдей жаран анализ тапшырууда. Апрель айынан бери 200 миңден ашуун жаран анализдерин тапшырды", — деди Айгерчинова.
Ал аталган тиркеме эмдөө боюнча электрондук портал менен интеграцияланып жатканын кошумчалады.
