БИШКЕК, 30-июл. — Sputnik. Талас облусундагы Киров суу сактагычына гидроэлектростанция курулат. Анын долбоорун энергетика жана өнөр жай министри Доскул Бекмурзаев менен президенттин облустагы ыйгарым укуктуу өкүлү Бакытбек Нарбеков жеринен талкуулаганын өкүлчүлүктүн маалымат кызматы билдирди.
Министр бул электр энергиясын чыгаруучу ишкана 30 мегаватт кубаттуулукта болорун жана ишке кирген учурда да аймактагы сугат системасына эч кандай таасирин тийгизбей тургандыгын белгиледи.
“Гидропроект” ишканасынын техниги Аскар Каленовдун айтымында, учурда гидроэлектростанция курула турган аймакка геодезиялык жумуштар жүргүзүлүүдө.
Облус башчысы буга чейин Киров суу сактагычына ГЭС куруу боюнча долбоор пландалып жатканын, ага 22 миллион доллар керектелерин айткан.
