БИШКЕК, 25-июл. — Sputnik. Саламаттык сактоо жана социалдык өнүктүрүү министрлиги аптаптуу ысыктан сактануу боюнча сунуштамаларын жарыялады.
Белгилей кетсек, 24-27-июль күндөрү өлкөдө мээ кайнаткан ысык аба ырайы күтүлөт. Чүй облусу жана өлкөнүн түштүк региондорунда күндүн табы 40 градуска, Талас облусунда 39 градуска чейин көтөрүлөт.
“Мындай жогорку температура ден соолукка кооптуулук жаратат. Өзгөчө, улгайгандарга, кош бойлууларга, балдарга, өнөкөт оорусу барларга (жүрөк-кан тамыр, өпкө оорулары, кант диабети) жана COVID-19 менен ооругандарга терс таасирин тийгизет. Бул суюктукту жана минералдык тузду — калий, магний жана башкаларды ашыкча жоготууга байланыштуу. Мындай учурда кан коюлуп, жүрөк-кан тамыр системасына кошумча жүк түшүп, тромб пайда болушу ыктымал”, — деп эскертти министрлик.
Аны менен катар Саламаттык сактоо министрлиги ысыктан коргонуу үчүн 10 кеңеш сунуштады:
- мүмкүн болушунча күндүн нуру түз тийген жерден оолак болуңуз. Көлөкөдө басып же көчөгө чыгууну чектеңиз. Айрыкча, күн саат 12:00дөн 17:00гө чейин катуу ысыйт, бул учурда салкын имараттын ичинде болууга аракет кылыңыз;
- баш кийим кийиңиз, кол чатыр колдонуңуз;
- мүмкүн болушунча кыймылды жана акыл-эсти иштетүүнү азайтуу шарт;
- суу ичүү режимин сактаңыз. Суюктукту көп ичиңиз, бирок ошол эле маалда суусундуктар өтө муздак болбошу керек. Себеби мунун айынан ооруп калышыңыз ыктымал. Ар жарым саат сайын суу ичип туруу зарыл;
- мөмө жана жер-жемишти көбүрөөк жеш керек. Алар канчалык ширелүү болсо, организмдеги суюктуктун ордун толтурууга ошончолук жакшы;
- арыктагы, каналдардагы, фонтан жана башка көчөдөгү сууну ичүү кооптуу экенин жакындарыңызга эскертиңиз. Алар эс алып, ойноп же башка бир нерсе менен алектенип жатканда коргоочу каражаттар жана таза суу менен камсыздаңыз;
- желдеткич жана кондиционер колдонуңуз. Желдеткичтин абаны үйлөгөн багытын өзүңүз тарапка койбоңуз, ар тарапка үйлөп турганы жакшы. Мындан сырткары, кондиционер менен аябай муздатылган имараттын ичинен дароо ысыкка чыгууга болбойт. Суук тийип ооруп калышыңыз ыктымал;
- пахта жана зыгыр кездемесинен тигилген кийимдерге басым жасаңыз, чапташкан кийимдер сунушталбайт. Аба өткөрө турган кийимдерди тандаңыз. Анан да ачык түстө болушу керек, себеби кара түстүү кийим өзүнө ысыкты тартат;
- тез-тез душка түшүп же чачыкты муздак сууга малып денеңизди арчып туруңуз. Эгер мындай мүмкүнчүлүк жок болсо, дүкөндөрдө сатылган нымдуу чүпүрөктү колдонуңуз;
- ыңгайына жараша ысыкта жылаңайлак басыңыз. Чөптүн үстүндө 10-15 мүнөт басуу кан айланууну жакшыртат. Натыйжада чыйралып, өзүңүздү жакшы сезип каласыз.
