БИШКЕК, 22-июл. — Sputnik. Баткен облусунун 10 абитуриенти Томск мамлекеттик архитектура жана курулуш университетине бюджеттик формада тапшыра алат. Бул тууралуу Кыргызстандын Россиядагы элчилигинен билдиришти.
Үстүбүздөгү жылдын июнь айында элчи Гүлнара-Клара Самат облус калкына колдоо көрсөтүү иш-чараларынын алкагында барган. Кийин элчилик тарабынан балдарга билим берүү маселеси иштелип чыккан.
"Баткендин 10 бүтүрүүчүсү Томскиден Кыргызстанда талап күч болгон инженердик-техникалык кесиптерге ээ боло алышат. Балдар бюджеттик формада окушат", — деп айтылат маалыматта.
Элчилик Баткендин жаш тургундары келечекте окуусун ийгиликтүү аяктап, Кыргызстандын архитектура жана курулуш тармагына салым кошот деп ишенет.
