Мурда киностудияга түшкөн жакшы сценарийлерди тартууга каражат чыкпай калчу эле. Эми мыкты сценарий болсо англис тилине которуп, сырттан дагы финансылык колдоо тарта баштадык. Бул тууралуу Темир Бирназаров Sputnik Кыргызстан радиосунун эфиринде маек куруп жатып билдирди.
Бирназаров: "Кыргызфильм" эл аралык стандарттагы система менен иштеп жатат
Анын айтымында, сценарийлерди тандоо боюнча "Кыргызфильм" киностудиясына эл аралык стандарттагы тутум киргизилди.
"Улуттук "Кыргызфильм" киностудиясынын башкы редактору болгонума жети ай болуп калды. Азыр жаш адис, оператор Акжол Бекболотов менен киностудияга заманбап, учурга ылайыктуу система кийирип жатабыз. Мурда көркөм кеңеш сценарийлерди жабык түрдө кабыл алып, 2-3 ай ичинде эле жеңүүчүсүн жарыя кылып койчу. Азыр эл аралык стандарттагы тутум кирди. Мында көркөм кеңешке долбоор ачык тартууланат. Тандоого сценарийдин авторлору, журналисттер катыша алат. Себеби мамлекеттин акчасына кандай фильм тартылып, кандай иштер аткарылып жатканы баарына маалым болушу керек. Ошону менен бирге киностудиянын сайты ачылат. Сайтка бизге келип түшкөн сценарийлер илинет. Бул жерде кино сүйүүчүлөр сценарийлерди окуп, талкуулай алышат. Буга чейин Кинематография департаментинин эксперттик комиссиясынын төрагасы болчумун. Ал жакта дагы сценарий боюнча бир айлык конкурс жарыяланып, бул убакыт аралыгында көп сценаристтер катышууга жетишпей калышчу. Департаментке дагы жогорудагыдай эле система киргизилди. Өзгөчө, жаштарга басым жасалып жатат. Ал жерде атайын тематика белгиленип, ага жараша эмгектер кабыл алынат", — деди Бирназаров.
Ал "Кыргызфильм" киностудиясы оюн жана даректүү тасмалардын сценарийин 2022-жылга чейин кабыл аларын кошумчалады.
