Көкүлов: баланы кесип тандоодо шаштырбагыла
12:31 21.06.2021 (Жаңыртылды: 14:27 14.12.2021)
© Sputnik / Асель Сыдыкова
Жазылуу
Экономист, журналист, укук коргоочу Эрулан Көкүлов журналист болуусуна атасы каршы болгонун айтты.
Кээ бир адамдар өз кесибин 20-25 жашында тапса, айрымдары 30-35 жашка келгенде ким боло турганын анык билет экен. Ошондуктан кесип тандоодо адамды шаштырбаш керек. Эмне себептен окуп жатканын билбеген студенттен жакшы деле адис чыкпайт. Мындай пикирин Эрулан Көкүлов Sputnik Кыргызстан радиосунун эфиринде маек куруп жатып билдирди.
Көкүлов: баланы кесип тандоодо шаштырбагыла
Анын айтымында, журналистикага келгенге чейин официант, кассир, күзөтчү болуп, курулушта, жарнама агенттигинде да иштеген.
"Мен сабакты ортодон жогорураак окуган баламын. Эрке чоңойгондуктан каалаган нерсемди кылып өстүм. Ошондон улам өзүмдүкүн бербеген ушундай мүнөзүм калыптанды окшойт. Кыргыздарда мектепти бүткөндөн кийин дароо жогорку окуу жайда кайсы бир кесипти өздөштүрүп чыгыш керек деген талап же түшүнүк бар. Албетте, бул туура ой. Бирок шашылбаш керек. Кээ бир адамдар өз кесибин 20-25 жашында тапса, айрымдары 30-35 жашка келгенде ким болорун билет экен. Андыктан мындай талап болбой эле койсо жакшы болот. Эмне себептен окуп жатканын билбеген студенттен жакшы деле адис чыкпайт. Өз тажрыйбамды айта турган болсом, мен журналист же хирург болууну каалагам. Учурунда журналистикага баруума атам каршы болсо, медицинага акчам жеткен эмес. Ошентип окууга тапшырыш керек болуп эле экономика бөлүмүндө окуп калгам. Чынында азыр экономист болуп иштеген жокмун жана иштегим да келбейт. Мен элдин керегине жарап, коомдук иштер менен алектенгенди жакшы көрөм. "Не сахар" автордук долбоорумду алып чыгуумдун себеби да ушул болду окшойт", — деди Көкүлов.
Ал журналист болуп эмгектенгенине үч жыл болгонун кошумчалады.
