КРдин эл артисти, киноактёр Орозбек Кутманалиевдин байбичеси жана уул-кыздары менен түшкөн сүрөт 1985-жылы 8-мартта Фрунзе (азыркы Бишкек) шаарында тартылган.
Биринчи катарда оңдон солду көздөй тун уулу Акматбек, кыздары Чынара, Шайыргүл, Айнура, ортодо Марс, кыздары Бактыгүл менен Динара жана четте Касен турат. Экинчи катарда келини Дамира, кызы Мээрим жана аялы Фатима, ортодо кызы Рахат менен баласы Каныбек. Сол жагында Орозбек Кутманалиев эки небересин эки жагына алып отурат жана алардын четинде келини Замира.
Ошол кезеңди белгилүү актёрдун тун уулу Акматбек Орозбеков мындайча эскерет.
"Бул сүрөт биздин үй-бүлөбүз үчүн аябай баалуу. Анткени сүрөттө атам, апам, алардын эки небереси, биздин 11 бир тууган, менин жана Марстын келинчеги түшкөн. Көпчүлүк учурда биздин мындай толук курам менен чогулушубуз кыйын болчу. Жылына жок дегенде бир жолу жалпы сүрөткө түшкөндүктөн кээде фотограф "көбөйүп менин объективиме батпай баратасыңар" деп калчу. Биз дайыма жаңы жыл майрамынан кийин 1-январда, 8-мартта апабызды куттуктап, 10-майда атамдын туулган күнүнө чогулчубуз. Ата-энебиз жайыл дасторкон эле, үйдөн мейман үзүлчү эмес. Атам бизди кичинекей кезде баланча окуу жайда билим ал, тигил жакта иште, жумушка киргизип коёюн деген жок, өз эркибизге коюп чоңойтту. Ошондуктан биз университет, институттарды өзүбүз тандап, көпчүлүгүбүз аз алдыбызча жогорку билимдүү болуп, ар кыл тармакта эмгектенип келебиз. Азыр апам небере, чөбөрө көрүп биздин сый-урматыбызда", — деди Орозбеков.
Ал эми кызы Динара Кутманалиева атасы жөнүндө буларды кошумчалады.
Орозбек Кутманалиев биринчи никесинен беш, экинчи жубайынан алты балалуу болгон. Байбичеси менен 35 жыл чогуу жашаган түгөйлөр алты кыз, беш уулду тарбиялап, 40ка жакын небере көрүшкөн.
