Алдын ала маалымат боюнча, Баткен районунда 30 турак үй, эки мектеп, бир бала бакча жана бир ФАП, ошондой эле үч мамлекеттик мекеме толугу менен талкаланган. Лейлек районунда 48 үй өрттөлүп жок болгон. 10 май куюучу жай, сегиз дүкөн жана мамлекетке караштуу бир мекеме жарактан чыккан.
Чек арадагы чатак жергиликтүү тургундарды жана мамлекетти ири материалдык чыгымга учуратты.
Миномет, гранатометтук чабуулдан "Головной" суу бөлүштүрүүчү жайда жергиликтүү 25 тургун каза болгон. Куралдуу кагылышууда жалпысынан 36 кыргызстандык, анын ичинде 13 жаштагы кыз жана төрт жашар бала ажал тапкан. Дагы 160тай адам жапа чеккен. Баткен районунун Ак-Сай, Көк-Таш, Орто-Боз, Ак-Татыр, Кара-Бак жана Кызыл-Бел айылдарынан, ал эми Лейлек районунун Жаңы-Жер, Бешкент, Кулунду айылдарынан бардыгы болуп 40 649 адам коопсуз жайга чыгарылган.
