Жапаров белекке алган Усубалиевдин автоунаасын музейге тапшырат. Сүрөт

© Sputnik / Сергей ПятаковГаз-69 унаасы. Архив
Газ-69 унаасы. Архив - Sputnik Кыргызстан, 1920, 09.02.2021
Жазылуу
Yandex newsTelegram
Өлкө башчыга Турдакун Усубалиевдин автокөлүгүн Кочкор районунан келген Бакай аттуу киши тапшырган. Саясий ишмерге 00-01 ФИА номерлүү автоунаа 1970-жылы берилген.
БИШКЕК, 9-фев. — Sputnik. Президент Садыр Жапаров белгилүү саясий ишмер Турдакун Усубалиевдин автоунаасын белекке алганын, бирок аны музейге тапшырууну ылайык көрүп турганын билдирди. Бул тууралуу өзүнүн Instagram баракчасы аркылуу кабарлады.

Посмотреть эту публикацию в Instagram

Публикация от Садыр Жапаров (@sadyr_japarov)

Мамлекет башчы автоунааны Кочкор районунан келген Бакай аттуу киши белекке бергенин айткан.
"00-01 ФИА номерлүү автоунаа 1970-жылы Турдакун Усубалиевге берилген экен. Темир тулпар бир нече жыл тебилип, кийин Кочкордогу жердештеринин колунда көздүн карегиндей сакталып турган. Мени суктандырганы, машина дале жапжаңы, жакшы каралган экен. Кадимкидей от алып, тепсең Турдакун Усубалиевдин учурундагыдай эле зуулдайт", — деп жазган Жапаров.
Ал Кыргызстанды 1961-1985-жылдары башкарган кишиден калган таберик буюмдун рулун кармап, ырымга ары-бери айландырып турганында өлкөнүн бир үзүм тарыхы көз алдына элестей түшкөнүн билдирген.
Президент Садыр Жапаров - Sputnik Кыргызстан, 1920, 08.02.2021
Жапаров кабинетке анын эмес, Раззаков сыяктуу чыгаандардын сүрөтүн илүүгө чакырды
"Бул автоунаа өмүрү жана ишмердиги биздин өлкөбүздүн өнүгүшүнө терең из калтырган адамдын аты менен байланыштуу болгондуктан, аны короомдун ичинде — көздөн далдоодо каткан болбойт деген ойго токтодум. Мындай баалуу тарыхый буюм баарыбызга тең орток, баарыбыздын энчибиз. Заманбап автоунаалардын түрү жайнаган азыркы заманда жаш муун көрүп, ата-бабалардын кандай унаа тээп, жок эле дегенде кандай шартта жашап-иштегенин элестетип алышса. Ошондуктан Турдакун Усубалиевден калган автоунааны Улуттук тарых музейине белекке тартуулоону туура көрдүм", — деп жазган Жапаров социалдык тармактагы баракчасына.
Өлкөнү кыйроодон сактап калган Турдакун Усубалиев тууралуу Sputnik даярдаган фактыдан окуңуз.
Жаңылыктар түрмөгү
0