БИШКЕК, 24-дек. — Sputnik. 2020-жылдагы республикалык бюджеттин жалпы чыгашаларынын 53 пайызга жакыны социалдык маселелерди чечүүгө жумшалат. Бул тууралуу финансы министринин орун басары Улукбек Кармышаков билдирди. Ал "КР бюджетинин дефицити: пенсияны төлөө жана мамлекеттик карыз боюнча сүйлөшүүлөр жөнүндө" аттуу Sputnik Кыргызстан агенттигинин мультимедиалык маалымат борборунда өткөн брифингге катышты.
"Быйыл республикалык чыгымдардын 11 пайыздан ашыгы саламаттык сактоо тармагына, 22 пайыздан ашыгы билим берүү тармагына, 13 пайызга жакыны социалдык жактан коргоого жумшалган. Ошентип жалпы чыгымдардын 52-53 пайызга жакыны социалдык маселелерге сарпталат", – деди ал.
Кармышаков кошумчалагандай, 2019-жылдын аягына чейин мамлекет бюджеттик чыгымдардын 55,3 пайыздан ашыгын социалдык маселелерге жумшаган. Тагыраагы, сөз саламаттык сактоо, билим берүү, социалдык коргоо, спорт жана эс алуу жөнүндө болуп жатат.
Министрдин орун басары, ошондой эле, өкмөт айлыктын, пенсиянын жана жөлөк пулдардын өз убагында төлөнөрүнө ишендирип кетти.
Буга чейин Кармышаков төмөндөгүлөргө токтолгон:
- Матраимов төккөн каражат кайда жумшалат;
- Тышкы карызды төлөө үчүн ыктыярчылардан алынган каражат топтолуучу эсепке канча акча түштү;
- Евразия турукташтыруу жана өнүктүрүү фондунун кеңеши тарабынан Кыргызстанга бериле турган кредит.
