Бектенов: быйыл электр энергиясын өндүргөндөн да көп колдондук
Электр энергиясын үнөмдүү пайдалануу актуалдуу тема болуп жатат. Себеби 2020-жылдын планына ылайык биздин өкмөттүн токтому боюнча 14 миллиард 454 миллион кВт саат электр энергиясын өндүрсөк, талапты толук жапмакпыз. Тилекке каршы, он бир айдын жыйынтыгы менен 14 миллиард 913 миллион кВт саат энергияны колдондук. Бул тууралуу Таалайбек Бектенов Sputnik Кыргызстан радиосунун эфиринде маек куруп жатып билдирди.
Анын айтымында, коңшу Казакстандан 500 миллион кВт саат электр кубатын импорттоо боюнча май айында сүйлөшүү жүргөн, бирок казак тарап азыркыга чейин бере албай жатат.
"Электр энергиясынын көп короп жатышы жылдан-жылга керектөөчүлөр көбөйүп, үнөмдөө азайып жатканынан кабар берет. Ар жылы биринчи суук түшкөн маалда өтө көп пайдаланылып, 2-3 жуманын ичинде отун-суусун алгандан кийин колдонуу азайып калчу эле. Ошону менен кыш мезгилинен график боюнча ашыкча чыгым болбой чыгып кетчүбүз. Быйыл кыш мезгили чынында эрте келди. Колдонуучурлар электр кубатын дагы деле көп коротуп жатышат. Мына, өткөн жумада эле бир суткада электр энергиясынын сарпталышы 3240 МВт чыгып кетти. Мындай эч качан болгон эмес. Бул чыңалуу жабдыктардын автоматтык түрдө өчүп калышына алып келиши мүмкүн. Ошондуктан кошумча жылыткыч сайгандарды, жарыкты ашыкча колдонгондорду электр кубатын сарамжалдуу пайдаланууга чакырабыз", — деди Бектенов.
Ал электр станциялары ААКнын быйылкы оңдоп-түзөө иштерине 742 миллион 452 сом каралып, анын 634 миллион 994 миңи колдонулганын кошумчалады.
