БИШКЕК, 18-дек. — Sputnik. Кыргызстан Россияда чыгарылган коронавируска каршы вакцинаны алууга кызыкдар. Бул тууралуу президенттин милдетин аткаруучу Талант Мамытов КМШ өлкөлөрүнүн онлайн жыйынында билдирди.
Мамытов Владимир Путинди Россия COVID-19га каршы вакцина иштеп чыкканы менен куттуктап, бул бардык адамзаты үчүн маанилүү экенин белгиледи.
"Кыргыз тарап россиялык вакцинаны алууга кызыкдар экенин дагы бир ирет билдирип койгум келет", — деп айткан ал.
Андан соң Путин Россия бардык КМШ өлкөлөрүнө вакцина жаатында жардам берүүгө даяр экенин айтып, препаратты өндүрүү иштерин биргеликте жасоону сунуштаган.
Белгилей кетсек, россиялык адистер дүйнөдө биринчилерден болуп коронавируска каршы "Спутник V", андан соң "ЭпиВакКорона" вакцинасын иштеп чыккан. Кыргызстан дарыларды алып келүү боюнча Россия баштаган бир нече өлкөлөр менен макулдашып жатат.
