БИШКЕК, 17-дек. — Sputnik. Россиянын президенти Владимир Путин маалымат жыйын учурунда эмне себептен коронавируска каршы эмдөө ала электигин айтып берди.
Мамлекет башчысына Россия башка өлкөлөргө вакцина берип жардам кыла баштаса өздөрүнө жетпей калуу коркунучу жана лидер өзү эмдөөдөн өткөн-өтпөгөнү боюнча суроо узатылды.
"Адистердин айтымында, вакцина алгач атайын бир категорияга кирген курактагы адамдарга берилет экен. Жаш курак боюнча мага жете элек. Өзүм мыйзам менен жүргөн адаммын, ошондуктан эмдөө ала элекмин. Бирок мүмкүнчүлүк пайда болор замат алам", — деди Путин.
Россия лидери жарандар массалык түрдө эмдөөдөн өтүшүн колдой турганын белгилеп, бирок вакцина өндүрүүдө көйгөй бар экенин айткан. Анткен менен жаңы жылдан тарта вакцинанын миллион дозасы чыгарыларын кошумчалаган.
"Башка мамлекеттер менен кызматташуу боюнча... Өндүрүштүн технологиялык мүмкүнчүлүктөрүн жакшыртуу үчүн бизге убакыт керек. Бирок компоненттер жетиштүү башка мамлекеттер өндүрүштү кеңейтип, жабдыктарды сатып алууга өздөрүнүн акчасын жумшаса болот", — деди Путин.
Путин коронавируска каршы вакцинанын бир дагы кыйыр таасири жок экенин айткан.
