БИШКЕК, 11-дек. — Sputnik. Евро курсунун жогорулашы Кыргызстандын экономикасы үчүн пайдалуу болушу мүмкүн. Бул тууралуу Улуттук банк Sputnik Кыргызстан агенттигине билдирди.
Ноябрдын ортосунда евро 100 сомдон ашкан. Акыркы маалыматтар боюнча, анын баасы 103,4 сомду түзүүдө (сатуу). Редакция Улуттук банктан Европанын валюта курсунун жогорулашы калктын, уюмдардын жана экономиканын абалына кандай таасир этерин сурады.
"Республикадагы соода бүтүмдөрүндө негизги валюта доллар болуп саналат, ал эми евронун алмашуу курсунун өзгөрүшү экономикага чектелген гана таасирин тийгизүүдө. Мындан тышкары, 2016-жылы Европа биримдиги Кыргызстанга ВСП + (Преференциялардын жалпыланган системасы) статусун берген, мындай шарт биримдикке 6 миңден ашык аталыштагы товарды бажы алымысыз киргизүүгө укук берет. Бул экспорттун көлөмүн көбөйтүүгө өбөлгө болуп, ата мекендик товарларга ыңгайлуу шарт түзөт", — деп жооп берди Улуттук банк.
Акыркы жылдары ЕБ өлкөлөрүнө товарларды экспорттоо (алтынды эсепке албаганда) багытында оң тенденция байкалып келет, бирок алардын начар диверсификацияланышынан, логистикалык системанын жана инфраструктуранын туруксуздугунан, көпчүлүк товарлардын сапатынын европалык стандартка шайкеш эместигинен жана башка себептерден улам салыштырмалуу төмөн бойдон калып жатканы белгиленди.
Жалпысынан сатуунун өсүшү жумушчу орундарды түзүүгө жана жабдууларды жаңыртууга мүмкүнчүлүк берип, Кыргызстандын экономикасына оң таасирин тийгизет.
