БИШКЕК, 9-дек. — Sputnik. Бажы боюнча мамлекеттик кызматтын төрагасынын мурдагы орун басары Райым Матраимов АКШнын Финансы министрлигинин санкциялык тизмесине илинди. Бул туурасында аталган сайтта жазылып турат.
9-декабрь — Коррупция менен күрөшүү боюнча эл аралык күн деп аталган бул датада Финансы министрлигинин чет жактагы активдерге көзөмөл кылуу башкармалыгы (OFAC) Азия, Африканын бир топ өлкөлөрүндө коррупцияга аралашкан кишилердин тизмесин жарыялады. Сайтта Матраимовго ачылган "санкциялык жеке баракчасы" да жүрөт.
Эмбарго адам укугун өтө катуу бузган жана коррупцияга илешкен деп күнөөлөнгөн адамдарга карата Магнитскийдин Глобалдуу мыйзамынын негизинде коюлуп келет.
Матраимов бажы системасынан 700 миллион долларды адалдап алууга катышкан деп күнөөлөнгөн. Анда Кыргызстандын чек арасынан анын калкалоосу алдында товарлардын эч тоскоолдуксуз өтүп турганы айтылган.
Мындан сырткары, Матраимов компаниялардан пара катары түшкөн акчаларды чогултуп жана бөлүштүрүп турган, Кыргызстандан курьерлер аркылуу накталай акчаларды алып чыгып кетүүгө көмөктөшкөн деп айтылат. АКШнын аталган уюму бажычы орун басар жетекчинин атын атаганда эле тартип коргоо органдары аларга тийген да, текшерген да эмес деп белгилейт.
"Мурдагы кызматын пайдаланып, ал өзү катышкан бажы схемасынын аркасынан жүз миллиондогон долларларды тапкан", — деген бүтүм чыгарган аталган америкалык финансылык орган.
Матраимов коррупцияга аралашкан, мамлекеттик мүлк менен активдерди менчиктеген, жеке пайдасы жана паракорлук үчүн башка бирөөнүн оокатын алып алган чет элдик катары белгиленген.
Бул санкциянын кесепети кандай болору билдирилген эмес.
УКМК 20-октябрда коррупцияга шектелген Райым Матраимовду кармагандыгы боюнча кабарлаган. Ал тергөө менен кызматташып, график менен (2020-жылдын ноябрь айынын соңуна чейин) 2 миллиард сомдук чыгымды төлөп бере тургандыгын айткан. Бирок айтылган мөөнөттө бул сумманы кайтарып бере алган жок. Матраимов азырынча 773 412 миң сом гана которду.
УКМКдан бажыдагы коррупциялык схемага малынган азырынча 40 адам аныкталганын айтышкан.
