Секиев: Бишкектеги көмүр менен жылыган 21 от казан газга алмаштырылууда
Улуттук илимдер академиясынын маалыматына ылайык, абаны булгоочу факторлор унаадан чыккан газ, калктуу конуштардагы от жаккандан чыккан түтүн жана ЖЭБ болуп саналат. Бул тууралуу Баатырбек Секиев Sputnik Кыргызстан радиосунун эфиринде маек куруп жатып билдирди.
Анын айтымында, учурда мэрия газ менен жүрө турган 100 автобусту алууга тендер жарыялады.
"Бишкек шаарынын генералдык планы боюнча, бул аймак 45 миңдей автоунаага ылайыкталган. Бирок Каттоо кызматынын берген маалыматында, калаада 426 миң автотранпорт бар. Анын 2300ү коомдук унаалар. Ошондой эле борбордогу 47 жаңы конуш абага 45 миң тонна, ал эми ЖЭБ жылына 23 миң тоннанын тегерегинде булгоочу зат бөлүп чыгарат. Жарандардын кайрылуусунун жана Кыргызгидрометтин абанын булгануусу боюнча берген маалыматынын негизинде өкмөттүн иш планы иштелип чыккан. Анда жылытуу системасы, транспорт, атмосферага мониториг жүргүзүү, курулушту көзөмөлдөө сыяктуу 40 пунктудан турган иш планы бар. Бул иш-чарага бардык министрлик, ведомстволор тартылып, ар кимиси өзүнө тиешелүү жумуштарды алып барып жатат. Алсак, 2019-жылдын аягында мэрия "Газпром" менен биргеликте 11 500 үйдү газга туташтырды. Биздин агенттик донорлорго кайрылып, Бишкектеги көмүр менен жылытылуучу 21 от казанды газга алмаштырып жатат. Ошондой эле 2020-жылы мэрия 8 миңге жакын бак-дарак отургузду. Шаарда эксплуатациясынын мөөнөтү өтүп кеткен унаалар бар. Бул боюнча Экономика министрлиги, Бажы кызматы иш алып барып, эски унааларга салыкты жогорулатып, түшүндүрүү иштери жүрүүдө", — деди Секиев.
Ал абанын булгануусун изилдеп, илимий сунуштамаларын алуу максатында Корея, Британия окумуштууларын чакырууну көздөп жаткандарын кошумчалады.
