БИШКЕК, 1-дек. — Sputnik. Ордо калаада бүгүндөн тарта кинотеатр, компьютердик клуб жана соода борборлордогу тамак-аш саткан жайлар иштеп баштады. Бул тууралуу вице-мэр Айжан Чыныбаева маалымат жыйын учурунда билдирди.
Анын айтымында, муну менен катар ишкерлерге бир нече талап коюлган.
"Аталган жайларда санитардык-эпидемиологиялык талаптар аткарылышы шарт. Ар бир кардардын бет кап тагынып жүргөнү көзөмөлгө алынып, аларды аралыкты сактап отургузуу зарыл. Ошондой эле залдар 50 пайызга гана толушу керек", — деди Чыныбаева.
Вице-мэр ишмердүүлүгүнө уруксат берилген жайлар тез-тезден текшерилип турарын эскертти.
