БИШКЕК, 13-ноя. — Sputnik. Президенттин милдетин аткаруучу Садыр Жапаров айыл чарбасында колдонууга жараксыз, сугат жерлерине бөлүнгөн аянттарга үй курган жарандардын көйгөйлөрүн чечүү боюнча мыйзамга кол койду. Бул тууралуу мамлекет башчынын маалымат кызматы билдирди.
Жапаров 4-ноябрда Жогорку Кеңеш тарабынан кабыл алынган "Жер пайдалануу чөйрөсүндөгү айрым мыйзам актыларына өзгөртүүлөрдү киргизүү жөнүндө" мыйзамга кол койду. Документ расмий жарыяланган күндөн тартып 10 күндөн кийин күчүнө кирет.
Кол коюлган мыйзамдын арты менен 2009-2018-жылдары айыл чарбасында колдонууга жараксыз жана жеке менчик укугуна мамлекеттик күбөлүгү бар айдоо аянттарынын бөлүнүп берилген жерлерине үй курган кыргызстандыктардын көйгөйлөрү чечилет. Мыйзам бул жерлерди трансформациялоого мүмкүнчүлүк берет.
Өкмөттүн эсеби боюнча 1 711,8 гектар жерди трансформациялоо пландаштырылууда, анын натыйжасында 11 300 үй-бүлөнүн социалдык көйгөйлөрү чечилет. Жер тилкелери мыйзамдаштырылгандан кийин, жер ээлери тийиштүү жарандык укуктарга ээ болуп, каттоого турууга мүмкүндүк алышат.
