БИШКЕК, 2-ноя. — Sputnik. Улуттук статистикалык комитет өлкөдөгү маданий жайлардын санын жарыялап, канчасы азыркы убакта иштеп жатканын айтты.
Белгилей кетсек, бүгүн, 2-ноябрь, маданият жана искусство кызматкерлеринин кесиптик майрамы.
Билдирмеге ылайык, азыркы тапта өлкөдө 20 театр иштейт. Анын ичинен сегизи Бишкекте, үчөө Жалал-Абадда, сегизи Ош шаарында. Мындан сырткары, Нарында экөө, Баткен жана Ысык-Көл облустарында бирден театр жайгашкан.
Кыргызстанда учурда кинотеатрлардын 45и иштей турганы маалым болду.
Аларда 2019-жылы 147 миң сеанс көрсөтүлүп, 2,3 миллион көрүүчү келген. Кинотеатрлардын көбү Бишкек шаары менен Чүй облусунда.
"2019-жылы өлкө аймагында 710 клуб тибиндеги маданий мекемелер иштеген. Алардын 92 пайызы айыл жергесинде жайгашкан. Бул маданий мекемелердин ичине филармония да кирет. Кыргызстанда тарыхый, тарыхый-этнографиялык, тарыхый-архитектуралык, тарыхый коруктар, мемориалдык, көркөм жана адабий болуп 67 музей бар. Былтыр көрүүчүлөргө 326 миңден ашык көргөзмө экспонаттары сунушталган", — деп айтылат маалыматта.
Маданият жана искусство чөйрөсүндө 12 миңге жакын кызматкер эмгектенсе, алардын 59 пайызы аялдар экени кошумчаланды.
